قازاقستاندا جەڭىلدەتىلگەن اۆتونەسيە قايتادان بەرىلە مە?

فوتو: renault-rostov.ru

ونەركاسىپ جانە قۇرىلىس ءمينيسترى قانات شارلاپاەۆ جەڭىلدەتىلگەن اۆتونەسيەلەۋ باعدارلاماسىنا قاتىستى پىكىر ءبىلدىردى, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ.

«جەڭىلدەتىلگەن نەسيەلەۋگە ەشكىمنىڭ ەشقاشان كوڭىلى تولمايدى. بۇل تۇسىنىكتى. سەبەبى ادام كوپ, قارجى از. وزدەرىڭىزگە بەلگىلى, اۆتوكولىك وندىرۋشىلەر مەن قارجى نارىعى ءبىر ورىندا تۇرمايدى. قازىر ۇكىمەت جەكە تۇلعالارعا ليزينگ ەنگىزۋ بويىنشا تۇزەتۋلەردى زاڭنامالىق تۇردە قولدادى. بۇل كولىكتى ساتىپ الۋدى جەڭىلدەتەدى. كولىك ساتاتىن كومپانيالاردىڭ ءوزى ءتۇرلى قارجىلىق قۇرالداردى جاساپ, كولىكتەردى ءبولىپ تولەۋ بويىنشا ساتىپ جاتىر. جەڭىلدەتىلگەن اۆتونەسيەلەۋگە باعىتتالعان قاراجاتقا كەلەر بولساق, بۇل قارجى قوعامدىق كولىكتى دامىتۋعا جۇمسالدى. بۇل دۇرىس ۇستانىم دەپ ەسەپتەيمىن. كولىكتەرگە جەڭىلدەتىلگەن نەسيە بەرۋدىڭ ورنىنا ءبىز قوعامدىق كولىكتەردىڭ ساپاسىن جاقسارتىپ جاتىرمىز», — دەپ جاۋاپ بەردى مينيستر.

ونىڭ سوزىنشە, جەڭىلدەتىلگەن اۆتونەسيەلەۋ ماسەلەسى 1,5 جىل بۇرىن جابىلدى.

«ەندى بۇل قاراجات قوعامدىق كولىكتى دامىتۋعا جۇمسالادى», — دەدى قانات شارلاپاەۆ.