قازاقستاندا جۋرناليستەرگە تالاپ كۇشەيەدى: بالاەۆا تىلشىلەردىڭ ۋاجىنە جاۋاپ بەردى

فوتو: تەنگرينيۋس كز

“اشىق” پورتالىندا اقپارات مينيسترلىگىنىڭ جۋرناليستەردى اككرەديتتەۋگە قاتىستى بۇيرىق جوباسى جاريالاندى, – دەپ حابارلايدى qandastar.kz atamekenbusiness_qaz تەلەگرام ارناسىنا سىلتەمە جاساپ.

قۇجاتقا سايكەس, جۋرناليست رەسمي شارادان العان اقپاراتتى الەۋمەتتىك جەلىسىندە جاريالاسا, كەلەسى جولى ۇكىمەت, پارلامەنت قابىرعاسىنا كىرگىزىلمەيدى. ياعني الىنعان رەسمي مالىمەت تەك ءوزىنىڭ جۇمىس ىستەيتىن تەلەارناسىندا نە سايت, گازەت-جۋرنالىندا شىعۋى ءتيىس. سونداي-اق شارا رەگلامەنتى مەن مەملەكەتتىك ماڭىزى بار نىسانداردا ءتارتىپتى ساقتاۋعا مىندەتتى. ورىنداماعان جاعدايدا اككرەديتاتسيادان ايىرىلادى. (2 رەت ەسكەرتۋ بەرىلەدى)

بۇل ماسەلە كەشەلى بەرى جۋرناليستەردىڭ نارازىلىعىن تۋعىزىپ وتىر. بۇگىن مينيستر بالاەۆا وسى ماسەلەگە جاۋاپ بەردى.

سوزىنشە, باق-تىڭ جۇمىس ىستەۋىن ۋاقىتشا توقتاتۋ نەمەسە مۇلدەم جابۋ سوت شەشىمى كۇشىنە ەنگەن جاعدايدا عانا مۇمكىن بولماق. سونداي-اق مينيستر جۋرناليستەر ساقتاۋى ءتيىس تالاپتارعا دا توقتالعان.

“بىرىنشىدەن, كەز-كەلگەن جۋرناليست قاي باق اتىنان اككرەديتاتسيادان وتسە, سول رەداكتسياعا عانا اقپاراتتى جيناپ, جاريالاي الادى. الايدا جۋرناليستكە بىردەن بىرنەشە باق اتىنان اككرەديتاتسيا الۋعا ەشكىم تيىم سالمايدى.

ەكىنشىدەن, بۇل تالاپ بەلگىلى ءبىر وقيعاعا/ىس-شاراعا قاتىستى جۋرناليستەردىڭ جەكە پىكىرلەرى مەن ۇستانىمدارىن الەۋمەتتىك جەلىلەردەگى جەكە اككاۋنتتارىندا بىلدىرۋگە قاتىسى جوق.

ۇشىنشىدەن, رەگلامەنت ماسەلەسىنە كەلەتىن بولساق, قولدانىستاعى ەرەجەلەردە قازىردىڭ وزىندە ءىس-شاراعا قاتىسۋشىلاردىڭ تاقىرىپتى, ۋاقىت ءتارتىبىن, قوعامدىق ءتارتىپتى ساقتاۋىن ءىس-شارا مودەراتورى قامتاماسىز ەتەتىنى قاراستىرىلعان.

اقش پەن ەۋروپالىق وداقتىڭ جانە حالىقارالىق ۇيىمداردىڭ حالىقارالىق تاجىريبەسى كورسەتكەندەي, بەلگىلەنگەن ەرەجەلەردى, سونداي-اق زاڭنامانى بۇزعان جاعدايدا جۋرناليست ءىس-شارالارعا قاتىسۋ قۇقىعىنان جانە اككرەديتاتسيادان ايىرىلادى.

تورتىنشىدەن, ەرەجەدە ءاربىر مەملەكەتتىك ورگاننىڭ نەمەسە ۇيىمنىڭ بەلگىلى ءبىر ءىس-شارانىڭ رەگلامەنتىن ءوزى بەكىتەتىندىگى كورسەتىلگەن.

بەسىنشىدەن, ەرەكشە ماڭىزدى مەملەكەتتىك وبەكتىلەرگە كىرۋ جانە سول مەكەمەلەردەگى رەجيمدەردى ۇستانۋ دا قولدانىستاعى زاڭنامانى ساقتاۋ مەن قاۋىپسىزدىكتىڭ اينىماس بولىگى”, – دەدى مينيستر.