قازاقستانداعى سۋ قويمالارى قانشالىقتى تولدى

«وسى ساعاتقا اقمولا وبلىسىندا ەكى ءىرى سۋ قويماسىنىڭ ورتاشا سۋ جيناۋى – 99 پايىز. مۇندا سۋ تاسقىنىنىڭ بەلسەندى كەزەڭى ءوتىپ, سالالارى تۇراقتاندى. جاباي وزەنىنىڭ رەتتەلمەيتىن اعىنى ارتۋدا. سوندىقتان اقمولا وبلىسىنىڭ اتباسار ەلدى مەكەنىندە سۋ تاسقىنى بار. سولتۇستىك قازاقستان وبلىسىندا 2 ءىرى سۋ قويماسى 100 پايىزعا تولى, سۋ تاسقىنى جالعاسۋدا. پەتروپاۆل قالاسى شەگىندەگى ەسىل وزەنىنىڭ دەڭگەيى – 1 176 سم, ءبىر تاۋلىكتە ول 138 سم-گە كوتەرىلدى. جاعداي كۇردەلى. ماماندار سۋ وتكىزۋ ءىس-شارالارىن اتقارىپ جاتىر», — دەدى رەسمي وكىل ورتالىق كوممۋنيكاتسيالار قىزمەتىندەگى بريفينگىدە.

ونىڭ دەرەگىنشە, اقتوبە وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى – 97 پايىز. وڭىردەگى جاعداي تۇراقتى. شىعىس قازاقستان وبلىسىندا ەكى ءىرى سۋ قويماسى بويىنشا ورتاشا سۋ جيناۋ كورسەتكىشى – 79 پايىز.

«اباي وبلىسىندا ءشۇلبى سۋ قويماسى 95 پايىزعا تولدى. ايماقتا سۋ تاسقىنى باستالدى. ءشۇلبى سۋ قويماسىنا بۇيىرلىك اعىنداردىڭ ۇلعايۋىنا بايلانىستى تابيعات قورعاۋ ءىس-شارالارى اياسىندا سۋ جىبەرىلىپ جاتىر. جالپى, ەرتىس كاسكادىنىڭ سۋ قويمالارى شتاتتىق رەجيمدە جۇمىس ىستەپ جاتىر. باتىس قازاقستان وبلىسىنداعى ءتورت ءىرى سۋ قويماسى 73 پايىزعا تولى. يريكلى سۋ قويماسىنان جىبەرىلگەن سۋ ءالى قازاقستان شەكاراسىنا جەتكەن جوق. وعان قاتىستى بولجام وزگەرمەدى. بۇل سۋ 16-17 ساۋىردە كەلەدى دەپ كۇتىلۋدە. قاراعاندى وبلىسىندا 3 ءىرى سۋ قويماسى 99 پايىزعا تولى. وڭىردە سۋ تاسقىنىنىڭ قاۋىپتى كەزەڭى ءوتتى. جاعداي تۇراقتى. قوستاناي وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى – 92 پايىز. مۇندا دا سۋ تاسقىنىنىڭ بەلسەندى كەزەڭى ءوتتى. قاراتومار سۋ قويماسى ترانزيتتىك رەجيمدە جۇمىسىن جالعاستىرۋدا», — دەدى ءمولدىر ابدۋاليەۆا.