Jańalyqtar
Qazaqstandaǵy sý qoımalary qanshalyqty toldy
Sý resýrstary jáne ırrıgaııa mınıstrliginiń resmı ókili Móldir Ábdýalıeva elimizdegi iri sý qoımalarynyń tolýyna qatysty keıingi derekterdi jarııa etti.
«Osy saǵatqa Aqmola oblysynda eki iri sý qoımasynyń ortasha sý jınaýy – 99 paıyz. Munda sý tasqynynyń belsendi kezeńi ótip, salalary turaqtandy. Jabaı ózeniniń rettelmeıtin aǵyny artýda. Sondyqtan Aqmola oblysynyń Atbasar eldi mekeninde sý tasqyny bar. Soltústik Qazaqstan oblysynda 2 iri sý qoımasy 100 paıyzǵa toly, sý tasqyny jalǵasýda. Petropavl qalasy shegindegi Esil ózeniniń deńgeıi – 1 176 sm, bir táýlikte ol 138 sm-ge kóterildi. Jaǵdaı kúrdeli. Mamandar sý ótkizý is-sharalaryn atqaryp jatyr», — dedi resmı ókil Ortalyq kommýnıkaııalar qyzmetindegi brıfıngide.
Onyń dereginshe, Aqtóbe oblysynda eki iri sý qoımasynyń ortasha sý jınaý kórsetkishi – 97 paıyz. О́ńirdegi jaǵdaı turaqty. Shyǵys Qazaqstan oblysynda eki iri sý qoımasy boıynsha ortasha sý jınaý kórsetkishi – 79 paıyz.
«Abaı oblysynda Shúlbi sý qoımasy 95 paıyzǵa toldy. Aımaqta sý tasqyny bastaldy. Shúlbi sý qoımasyna búıirlik aǵyndardyń ulǵaıýyna baılanysty tabıǵat qorǵaý is-sharalary aıasynda sý jiberilip jatyr. Jalpy, Ertis kaskadynyń sý qoımalary shtattyq rejımde jumys istep jatyr. Batys Qazaqstan oblysyndaǵy tórt iri sý qoımasy 73 paıyzǵa toly. Irıkli sý qoımasynan jiberilgen sý áli Qazaqstan shekarasyna jetken joq. Oǵan qatysty boljam ózgermedi. Bul sý 16-17 sáýirde keledi dep kútilýde. Qaraǵandy oblysynda 3 iri sý qoımasy 99 paıyzǵa toly. О́ńirde sý tasqynynyń qaýipti kezeńi ótti. Jaǵdaı turaqty. Qostanaı oblysynda eki iri sý qoımasynyń ortasha sý jınaý kórsetkishi – 92 paıyz. Munda da sý tasqynynyń belsendi kezeńi ótti. Qaratomar sý qoımasy tranzıttik rejımde jumysyn jalǵastyrýda», — dedi Móldir Ábdýalıeva.
