جاڭالىقتار
قازاقستاندىق اكىمدەردىڭ 60%-ى بۇرىن اكىم بولماعان جانە مەملەكەتتىك قىزمەتتە جۇمىس ىستەمەگەن
فوتو:Midjourney
ۆيتسە-پرەمەر قانات بوزىمباەۆ ەلىمىزدە «اكىمدەر مەكتەبى» جۇمىسىن باستاعانىن مالىمدەدى. ونىڭ ايتۋىنشا, بىلىكتىلىكتى ارتتىرۋ باعدارلاماسى اۋىلدىق ايماقتاردىڭ دامۋىنا جاڭا سەرپىن بولىپ, حالىقتىڭ تۇرمىس دەڭگەيىن جاقسارتۋعا مۇمكىندىك بەرەدى, دەپ حابارلايدى qandastar.kz
Stan.kz جازعانداي, وقىتۋ جوباسى ەكونوميكا, مەملەكەتتىك باسقارۋ, بيۋدجەتتىك جوسپارلاۋ, كوممۋنالدىق مەنشىكتى باسقارۋ, تسيفرلاندىرۋ, تاۋەكەل-مەنەدجمەنت, كاسىپكەرلىكتى دامىتۋ جانە ينۆەستيتسيالار تارتۋ سالاسىندا 17 مودۋل مەن 240 اكادەميالىق ساعاتتى قامتيدى.
قانات بوزىمباەۆتىڭ سوزىنشە, 2021 جىلدان باستاپ اۋىل اكىمدەرىن سايلاۋ ازاماتتاردىڭ جەرگىلىكتى ءوزىن-ءوزى باسقارۋعا بەلسەندى قاتىسۋىن قامتاماسىز ەتتى. ءسويتىپ اكىمدەردىڭ جاۋاپكەرشىلىگىن ارتتىردى. سودان بەرى 2,5 مىڭنان استام اۋىل اكىمدەرى سايلانعان.
«جاڭا لاۋازىمعا كەلگەننىڭ ءبارى 60%-ى بۇرىن اكىم بولماعان جانە مەملەكەتتىك قىزمەتتە جۇمىس ىستەمەگەن. كەيبىرەۋلەرى – كاسىپ يەلەرى نەمەسە پارتيا قىزمەتكەرلەرى. وسىلايشا, اكىمدەر كورپۋسى ايتارلىقتاي جاڭارتىلدى. 2023 جىلى اۋداندار مەن وبلىستىق ماڭىزى بار قالا اكىمدەرىنىڭ پيلوتتىق سايلاۋى ءوتتى. بارلىق وڭىردە 45 اكىم سايلاندى. بيىلدان باستاپ بارلىق اۋداننىڭ اكىمى تىكەلەي سايلاۋ ارقىلى عانا قىزمەتكە كىرىسەدى. بۇعان بايلانىستى بۇگىنگى «اكىمدەر مەكتەبىن» ىسكە قوسۋ ۋاقىتىلى ءارى ورىندى شەشىم دەپ سانايمىن. بىلىكتىلىكتى ارتتىرۋ باعدارلاماسى اۋىلدىق ايماقتاردىڭ دامۋىنا جاڭا سەرپىن بەرىپ, حالىقتىڭ تۇرمىس دەڭگەيىن جاقسارتۋعا مۇمكىندىك بەرەدى», – دەدى قانات بوزىمباەۆ.
ەسكە سالايىق, بۇعان دەيىن 28 قاڭتاردا ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ سايلاناتىن اكىمدەر اراسىندا مەملەكەتتىك قىزمەتتە ىستەمەگەن ءارى جاستار كوپ ەكەنىن ايتىپ, ولاردى دايىندىقتان وتكىزۋ ءۇشىن “اكىمدەر مەكتەبى” جوباسىن قوسۋدى تاپسىردى.
