Qazaqstandyq aktrısa Netflix fılmine túspek

Fotokollaj  Azattyq Rýhy

Qazaqstandyq tanymal aktrısa Altynaı Nógerbek Netflix platformasynyń QarLAG týraly jańa fılmge túsip jatyr, dep jazdy qandastar.kz

Ulys-qa bergen suhbatynda aktrısa túsirilimniń Ispanııanyń Bılbao qalasynda ótip jatqanyn jáne onyń 2,5 aıǵa sozylatynyn aıtty. Jobaǵa Qazaqstannan taǵy úsh akter – Dına Tasbolatova, Sergeı Ýfımev jáne Farabı Aqkózov shaqyrylǵan. Fılm rejısseri – «Býmajnyı dom» serıalymen tanymal ıspandyq Mıgel Angel Vıvas. Basty rólde «Elıta» dramasynan belgili Aaron Pıpper oınaıdy.

Altynaı Nógerbektiń aıtýynsha, bul joba Qazaqstandaǵy ıspan elshisiniń bastamasymen júzege asyrylǵan. Elshi QarLAG-ta bolǵan ıspandar týraly derekti fılmder túsirip, osy taqyrypty kórkem fılm retinde keńinen tanystyrýǵa usynys jasaǵan. Fılmniń senarııi birneshe ret ózgertilip, tolyqtyrylǵan.

Oqıǵa ıspan dárigeri men qazaq qyzy Aısulýdyń arasyndaǵy qarym-qatynasqa negizdelgen. Aısulýdyń rólin Dına Tasbolatova somdaıdy. Fılmde qazaq qyzynyń týǵan jerine degen súıispenshiligi men patrıottyq sezimi tereń kórsetiledi. Altynaı Nógerbek QarLAG-taǵy ananyń rólin oınaıdy. Fılmniń premerasy 2025 jyldyń sońyna josparlanǵan.