قازاقستاندىق ارنايى جاساق الەمدە ۇزدىكتەردىڭ قاتارىنا ەندى

فوتو: polisia.kz

دۋبايدا وتكەن حالىقارالىق SWAT Challenge جارىسى ءوز مارەسىنە جەتتى. بەدەلدى سايىسقا الەمنىڭ 80 ەلىنەن 100-دەن استام ارنايى جاساق بولىمشەسى قاتىستى,  دەپ حابارلايدى qandastar.kz

ءىىم ءباسپاسوز قىزمەتىنىڭ مالىمەتىنشە, جارىسقا قاتىسقاندار بەس كۇن بويى تاكتيكالىق, شتۋرمدىق, قۇتقارۋ وپەراتسيالارى, كەپىلدەگى ادامداردى بوساتۋ جانە كەدەرگىلەر جولاعىن ەڭسەرۋ بويىنشا ءوز شەبەرلىكتەرىن كورسەتتى.

«قازاقستان رەسپۋبليكاسى ىشكى ىستەر مينيسترلىگىنىڭ «سۇڭقار» ارنايى جاساعى بارلىق كەزەڭدە جوعارى ناتيجە كورسەتىپ, جالپى ەسەپتە كۇمىس جۇلدەنى جەڭىپ الدى. سونىمەن قاتار قازاقستاننىڭ وزگە دە ارنايى جاساق بولىمشەلەرى ۇزدىك وندىققا كىردى. ولاردىڭ قاتارىندا قر ۇقك «ارىستان» جانە SSN Aktau, مكق-نىڭ «ساردار» ارنايى جاساعى, سونداي-اق ىشكى ىستەر مينيسترلىگىنىڭ ۇلتتىق ۇلان قۇراماسى بار», – دەلىنگەن اقپاراتتا.

ايتا كەتەيىك, «سۇڭقار» كومانداسى العاشقى جانە ءۇشىنشى كەزەڭدەردە ءبىرىنشى ورىن يەلەندى. ناتيجەسىندە, ەكى التىن جانە جالپى قورىتىندى بويىنشا كۇمىس مەدال الىپ, جەتىستىككە جەتتى. كوماندا اتالمىش جارىسقا وسىمەن ەكىنشى رەت قاتىسىپ جاتىر.

بيىلعى سايىستىڭ تاريحي ەرەكشەلىگى – ىشكى ىستەر مينيسترلىگىنىڭ ارنايى جاساقتارىنىڭ اتىنان العاش رەت «توميريس» ايەلدەر كومانداسىنىڭ قاتىسۋى. ونىڭ قۇرامىندا كونكيمەن جۇگىرۋ سپورتى بويىنشا الەمدىك رەكورد يەگەرى, 2014 جىلعى وليمپيادا ويىندارىنىڭ قاتىسۋشىسى, سپورت شەبەرى جانە كۇشتىك سپورت تۇرلەرى بويىنشا ءتۇرلى دەڭگەيدەگى جارىستاردىڭ بىرنەشە دۇركىن جۇلدەگەرلەرى بار.

«توميريس» كومانداسى بارلىق سىناقتان ءساتتى ءوتىپ, ەرلەر كوماندالارىمەن تەرەزەسى تەڭ ونەر كورسەتتى. ناتيجەسىندە, ايەلدەر اراسىندا قازاقستان قۇراماسى ەكىنشى ورىنعا كوتەرىلدى.