Qazaqstandyq arnaıy jasaq álemde úzdikterdiń qataryna endi

Foto: polisia.kz

Dýbaıda ótken halyqaralyq SWAT Challenge jarysy óz máresine jetti. Bedeldi saıysqa álemniń 80 elinen 100-den astam arnaıy jasaq bólimshesi qatysty,  dep habarlaıdy qandastar.kz

IIM baspasóz qyzmetiniń málimetinshe, jarysqa qatysqandar bes kún boıy taktıkalyq, shtýrmdyq, qutqarý operaııalary, kepildegi adamdardy bosatý jáne kedergiler jolaǵyn eńserý boıynsha óz sheberlikterin kórsetti.

«Qazaqstan Respýblıkasy Ishki ister mınıstrliginiń «Suńqar» arnaıy jasaǵy barlyq kezeńde joǵary nátıje kórsetip, jalpy esepte kúmis júldeni jeńip aldy. Sonymen qatar Qazaqstannyń ózge de arnaıy jasaq bólimsheleri úzdik ondyqqa kirdi. Olardyń qatarynda QR UQK «Arystan» jáne SSN Aktau, MKQ-nyń «Sardar» arnaıy jasaǵy, sondaı-aq Ishki ister mınıstrliginiń Ulttyq ulan quramasy bar», – delingen aqparatta.

Aıta keteıik, «Suńqar» komandasy alǵashqy jáne úshinshi kezeńderde birinshi oryn ıelendi. Nátıjesinde, eki altyn jáne jalpy qorytyndy boıynsha kúmis medal alyp, jetistikke jetti. Komanda atalmysh jarysqa osymen ekinshi ret qatysyp jatyr.

Bıylǵy saıystyń tarıhı ereksheligi – Ishki ister mınıstrliginiń arnaıy jasaqtarynyń atynan alǵash ret «Tomırıs» áıelder komandasynyń qatysýy. Onyń quramynda konkımen júgirý sporty boıynsha álemdik rekord ıegeri, 2014 jylǵy Olımpıada oıyndarynyń qatysýshysy, sport sheberi jáne kúshtik sport túrleri boıynsha túrli deńgeıdegi jarystardyń birneshe dúrkin júldegerleri bar.

«Tomırıs» komandasy barlyq synaqtan sátti ótip, erler komandalarymen terezesi teń óner kórsetti. Nátıjesinde, áıelder arasynda Qazaqstan quramasy ekinshi orynǵa kóterildi.