قازاقستاندىق بالالار رۇقساتسىز فوتو-ۆيدەوسىن جەلىگە جاريالاعان اتا-اناسىن سوتقا بەرە الادى

فوتو: Freepik.com

كامەلەتتىك جاسقا تولعان بالا كىشكەنتاي كەزىندەگى فوتونى جەلىگە جاريالانعانى ءۇشىن اتا-اناسىن جاۋاپقا تارتا الادى. ياعني جاسوسپىرىمگە ەسكى فوتو-ۆيدەوسى ۇناماسا, ونى پاراقشاعا جۇكتەگەن اكە-شەشەسىنەن ايىپپۇل وندىرۋگە قۇقىلى. بۇل تۋرالى Stan.kz اقپارات اگەنتتىگى حابارلايدى.

ەلىمىزدىڭ ازاماتتىق كودەكسىنىڭ 145-بابىنا سايكەس, ادامنىڭ فوتو نەمەسە ۆيدەوسى تەك ونىڭ كەلىسىمىمەن جاريالانۋى ءتيىس. كامەلەت جاسىنا تولماعان بالانىڭ ۆيدەوسىن الەۋمەتتىك جەلىگە جۇكتەۋگە تەك ونىڭ اتا-اناسى قۇقىلى. الايدا «اكە-شەشەم فوتومدى رۇقساتسىز جاريالادى” دەسە, وندا ول 18 جاسقا تولعاننان كەيىن اتا-اناسىنان فوتولاردى ءوشىرۋىن تالاپ ەتىپ, قاجەت بولعان جاعدايدا مورالدىق شىعىن ءوندىرىپ الا الادى.

“ەگەر بالا كامەلەتتىك جاسقا تولعاننان كەيىن ونىڭ فوتوسۋرەتتەرى الەۋمەتتىك جەلىلەردە جاريالانىپ, ونىڭ قۇقىقتارىنا نەمەسە ابىرويىنا نۇقسان كەلتىرىلسە, ءوزىنىڭ اتا-اناسىنا قارسى سوتقا جۇگىنە الادى. سوت قاراۋ كەزىندە ناقىت جاعدايلاردى ەسكەرەدى. ياعني, بۇل فوتوسۋرەتتەردىڭ مازمۇنى قانداي, قانداي كونتەكستە جاريالانعان جانە مورالدىق زيان بار ما, جوق پا سونى انىقتايدى”, – دەدى زاڭگەر الينا تويباي.

ماماندار بالالاردىڭ فوتوسىن جۇكتەردە ساق بولۋعا شاقىرادى. ماسەلەن بۇلدىرشىننىڭ جالاڭاش نەمەسە جارتىلاي جالاڭاش فوتو-ۆيدەوسىن جاريالاۋعا بولمايدى. سونداي-اق بالانىڭ ءجيى ۋاقىت وتكىزەتىن ورنى مەن مەكەنجايىن ايعاقتايتىن فوتو سالماۋعا كەڭەس بەرەدى. ويتكەنى الاياقتار ءدال وسى فوتو ارقىلى جۇرگەنىن جەرىن تەز انىقتاپ, ءوزىنىڭ ارام نيەتىن ىسكە اسىرۋى مۇمكىن. بۇنىمەن قوسا, ونىڭ جەكە دەرەكتەرىن كورسەتەتىن فوتونى جۇكتەمەگەن ءجون.