قازاقستاندىق فيلم يتالياداعى فەستيۆالدىڭ باس جۇلدەسىن جەڭىپ الدى

«باۋىرىنا سالۋ» كارتيناسى يتالياداعى فەستيۆالدە ۇزدىك اتاندى, دەپ حابارلايدى Qandastar.kz.

قازاقستاندىق رەجيسسەر اسحات كۋچينچەرەكوۆتىڭ «باۋىرىنا سالۋ» ءفيلمى يتاليانىڭ يسكيا ارالىندا ءوتىپ جاتقان 23-ءشى Ischia Film Festival حالىقارالىق كينوفەستيۆالىنىڭ باس جۇلدەسىن جەڭىپ العان.

اتالمىش تۋىندى «ۇزدىك تولىقمەتراجدى فيلم» نوميناتسياسى بويىنشا جەڭىمپاز اتانعان. فيلم مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.

ايتا كەتەيىك, بۇعان دەيىن كارتينا Asia Pacific Screen Awards-تاعى ەڭ ۇزدىك جاستار ءفيلمى اتانسا, ازەربايجانداعى Baku International Film Festival دوداسىندا دا باس جۇلدەگە يە بولعان ەدى.

سونداي-اق فرانتسياداعى Cinema Heritage Festival بايقاۋىندا دا ارنايى ماراپاتقا يە بولعان. بۇدان بولەك, وپەراتور جاناربەك ەلەۋبەك Asia World Film Festival-دا «ۇزدىك وپەراتور» نوميناتسياسى بويىنشا توپ جاردى. سونىمەن قاتار فيلم رەسمي تۇردە قازاقستاننان «شەت تىلىندەگى ۇزدىك فيلم» نوميناتسياسى بويىنشا «وسكار-2025» سىيلىعىنا ۇسىنىلدى.

ءفيلمنىڭ سيۋجەتى ەجەلگى قازاق ءداستۇرى بويىنشا اجەسىنىڭ تاربيەسىندە بولعان بالانىڭ وقيعاسىن باياندايدى. اجەسى ومىردەن وتكەن سوڭ بالا اتا-اناسىنا ورالىپ, جاڭا ورتادا بەيتانىس ادامدارمەن قارىم-قاتىناسى قيىندايدى.