جاڭالىقتار
قازاقستاندىق ميلليونعا نەسيەگە ماسساج قۇرىلعىسىن ساتىپ الىپ, كەيىن ونىڭ 60 مىڭ تەڭگە تۇراتىنىن ءبىلدى
تۇتىنۋشىلاردىڭ قۇقىقتارىن قورعاۋ كوميتەتى ازاماتتار ماسساج جامىلعىلارىن شەكتەن تىس قىمبات باعاعا نەسيەگە ساتىپ العانىن مالىمدەدى. دۇكەندە قازاقستاندىقتارعا 60 مىڭ تەڭگەلىك قۇرىلعىنى 1 ميلليون تەڭگەگە راسىمدەپ بەرگەن. بۇل تۋرالى Qandastar.kz سايتى Stan.kz اقپارات اگەنتتىگىنە سىلتەمە جاساپ حابارلايدى.
باتىس قازاقستان وبلىسىنىڭ تۇرعىنى ماسساج جامىلعىسىنىڭ تانىستىرىلىمىنا قاتىسقان. ساتۋشىلار بۇل ءونىمدى «دەنساۋلىققا وڭ اسەر ەتەتىن جوعارى تەحنولوگيالى قۇرىلعى» رەتىندە سيپاتتاعان. الايدا ساتىپ الۋشىدا قاجەتتى سوما بولماعاندىقتان, ۇيىمداستىرۋشىلار وعان 1 ميلليون تەڭگەگە بانك ارقىلى ءبولىپ تولەۋ شارتىمەن راسىمدەپ بەرگەن.
ۇيگە كەلگەن سوڭ ازامات ينتەرنەت ارقىلى بۇل جامىلعىنىڭ ناقتى باعاسىن تەكسەرىپ كورگەن. بەلگىلى بولعانداي, وسىنداي قۇرىلعىلار ينتەرنەتتە 17 ەسە ارزان — 60 000 تەڭگەدەن باستالادى. ءوزىن الدانعانىن تۇسىنگەن سوڭ, ول ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىنگەن. ماماندار ساتۋشىعا شاعىم جولداپ, ارتىنشا تۇتىنۋشىعا اقشاسى قايتارىلعان.
وسىعان ۇقساس جاعداي ەكىنشى ءبىر ازاماتپەن دە بولعان. ول دا ماسساج جامىلعىسىن 1 ميلليون تەڭگەگە نەسيەگە العان. ونىڭ دا شاعىمىن قاراعاننان كەيىن اقشاسى قايتارىلىپ بەرىلگەن.
مۇنداي كەلەڭسىزدىكتەرگە جول بەرمەۋ ءۇشىن قازاقستاندىقتارعا كەلەسى كەڭەستەر بەرىلدى:
• قالاعان تاۋاردىڭ باعاسىن دۇكەندەردە جانە ونلاين-پلاتفورمالاردا سالىستىرىپ قاراۋ;
• كەلىسىمشارتتىڭ بارلىق تارماقتارىمەن, اسىرەسە, ۇساق ارىپپەن جازىلعان جەرلەرىمەن تانىسۋ;
• پايىزدىق مولشەرلەمەنى, تولەم مەرزىمىن جانە قوسىمشا تولەمدەر بار-جوعىن ناقتىلاۋ;
• كەپىلدىك پەن قايتارۋ شارتتارىن تەكسەرۋ.
«ەگەر ءسىز وسىنداي جاعدايعا تاپ بولساڭىز, كۇتپەستەن, ءتيىستى دەپارتامەنتكە نەمەسە ۋاكىلەتتى ورگاندارعا جۇگىنىڭىز. ۋاقتىلى شاعىم مەن دۇرىس راسىمدەلگەن قۇجاتتار ءسىزدىڭ قۇقىعىڭىزدى قورعاۋعا جانە كەلتىرىلگەن شىعىندى قايتارۋعا كومەكتەسەدى», – دەپ مالىمدەدى تۇتىنۋشىلاردىڭ قۇقىقتارىن قورعاۋ كوميتەتى.
