Qazaqstandyq mıllıonǵa nesıege massaj qurylǵysyn satyp alyp, keıin onyń 60 myń teńge turatynyn bildi

Tutynýshylardyń quqyqtaryn qorǵaý komıteti azamattar massaj jamylǵylaryn shekten tys qymbat baǵaǵa nesıege satyp alǵanyn málimdedi. Dúkende qazaqstandyqtarǵa 60 myń teńgelik qurylǵyny 1 mıllıon teńgege rásimdep bergen. Bul týraly Qandastar.kz saıty Stan.kz aqparat agenttigine silteme jasap habarlaıdy.

Batys Qazaqstan oblysynyń turǵyny massaj jamylǵysynyń tanystyrylymyna qatysqan. Satýshylar bul ónimdi «densaýlyqqa oń áser etetin joǵary tehnologııaly qurylǵy» retinde sıpattaǵan. Alaıda satyp alýshyda qajetti soma bolmaǵandyqtan, uıymdastyrýshylar oǵan 1 mıllıon teńgege bank arqyly bólip tóleý shartymen rásimdep bergen.

Úıge kelgen soń azamat ınternet arqyly bul jamylǵynyń naqty baǵasyn tekserip kórgen. Belgili bolǵandaı, osyndaı qurylǵylar ınternette 17 ese arzan — 60 000 teńgeden bastalady. О́zin aldanǵanyn túsingen soń, ol Saýda jáne tutynýshylardyń quqyqtaryn qorǵaý departamentine júgingen. Mamandar satýshyǵa shaǵym joldap, artynsha tutynýshyǵa aqshasy qaıtarylǵan.

Osyǵan uqsas jaǵdaı ekinshi bir azamatpen de bolǵan. Ol da massaj jamylǵysyn 1 mıllıon teńgege nesıege alǵan. Onyń da shaǵymyn qaraǵannan keıin aqshasy qaıtarylyp berilgen.

Mundaı keleńsizdikterge jol bermeý úshin qazaqstandyqtarǵa kelesi keńester berildi:

•    qalaǵan taýardyń baǵasyn dúkenderde jáne onlaın-platformalarda salystyryp qaraý;
•    kelisimsharttyń barlyq tarmaqtarymen, ásirese, usaq árippen jazylǵan jerlerimen tanysý;
•    paıyzdyq mólsherlemeni, tólem merzimin jáne qosymsha tólemder bar-joǵyn naqtylaý;
•    kepildik pen qaıtarý sharttaryn tekserý.

«Eger siz osyndaı jaǵdaıǵa tap bolsańyz, kútpesten, tıisti departamentke nemese ýákiletti organdarǵa júginińiz. Ýaqtyly shaǵym men durys rásimdelgen qujattar sizdiń quqyǵyńyzdy qorǵaýǵa jáne keltirilgen shyǵyndy qaıtarýǵa kómektesedi», – dep málimdedi tutynýshylardyń quqyqtaryn qorǵaý komıteti.