قازاقستاندىق سەيسمولوگتار الماتىدا ءبىر ايدا 8 مىڭنان استام جەر سىلكىنىسىن تىركەدى

سەيسمولوگيالىق باقىلاۋلار جانە زەرتتەۋلەر ۇلتتىق عىلىمي ورتالىعىنىڭ ديرەكتورى داۋلەت سارسەمباەۆتىڭ ايتۋىنشا, بۇگىنگى جەر سىلكىنىسى كەزەكتى ءدۇمپۋ بولدى. «بۇگىن ساعات 10:15-تە جەر سىلكىنىسى تىركەلدى. بىردەن ايتا كەتەيىن, بۇل جەر سىلكىنىسىنىڭ ءدۇمپۋى. 23 قاڭتاردان باستاپ, بۇگىنگە دەيىن ءبىزدىڭ سەيسميكالىق ستانتسيالار 8 مىڭنان استام جەر سىلكىنىسى ءدۇمپۋىن تىركەدى. ونىڭ 100-دەن استامى ماگنيتۋداسى 5 جانە ودان دا كوپ. ال وڭتۇستىك استانا تۇرعىندارى مەن قوناقتارعا وسىنىڭ 20-سى عانا سەزىلدى. دۇربەلەڭگە نەگىز جوق», — دەدى سەيسمولوگيالىق باقىلاۋلار جانە زەرتتەۋلەر ۇلتتىق عىلىمي ورتالىعىنىڭ ديرەكتورى داۋلەت سارسەمباەۆ. الماتى قالاسى توتەنشە جاعدايلار دەپارتامەنتىنىڭ حابارلاۋىنشا, جەر سىلكىنىسىنەن كەيىن اۋماقتاردىڭ زاقىمدانۋى, سونداي-اق تىرشىلىكتى قامتاماسىز ەتۋ نىساندارىنىڭ جۇمىسى باقىلاۋعا الىندى. مونيتورينگ ناتيجەسى بويىنشا جاعداي تۇراقتى, بارلىعى قالىپتى جۇمىس ىستەپ جاتقانى اتاپ ءوتىلدى.