جاڭالىقتار
قازاقستاندىق سپورتشى UFC-دە نوكاۋتپەن جەڭىلىپ, جەكپە-جەكتەن كەيىن توبەلەس شىعاردى
فوتو:Chris Unger/Zuffa LLC
قازاقستاندىق ارالاس جەكپە-جەك (MMA) شەبەرى نيكولاي ۆەرەتەننيكوۆ UFC اياسىندا قاتارىنان ەكىنشى جەڭىلىسىنە ۇشىرادى, دەپ جازدى qandastar.kz
سپورتشى اقش-تىڭ ۆاشينگتون شتاتى, سيەتل قالاسىندا وتكەن Fight Night سەرياسىنىڭ تۋرنيرىندە الدىن الا كارد اياسىندا ونەر كورسەتتى. ونىڭ قارسىلاسى – UFC-دەگى دەبيۋتتىك جەكپە-جەگىن وتكىزگەن امەريكالىق وستين ۆاندەرفورد, بۇرىن Bellator چەمپيونى اتاعىنا ۇمىتكەر بولعان.
جەكپە-جەك قىسقا مەرزىمدە كەلىسىلىپ, ارالىق سالماقتا (79,4 كگ دەيىن) ءوتتى. ءۇش راۋندقا جوسپارلانعان ايقاس ەكىنشى راۋندتا اياقتالدى.
جەكپە-جەكتىڭ العاشقى راۋندىندا-اق ۆاندەرفورد باسىمدىقتى ءوز قولىنا الىپ, پارتەردە قارسىلاسىنا ءبىرشاما سوققى جاسادى. ەكىنشى راۋندتا دا وسى جاعداي قايتالاندى. تورەشى جەكپە-جەكتى توقتاتىپ, تەحنيكالىق نوكاۋت تىركەدى.
ۆاندەرفورد جەڭىسىن تويلاپ جاتقان كەزدە, ۆەرەتەننيكوۆ اشۋلى تۇردە ونىڭ ارقاسىنان يتەرىپ جىبەردى. وسىدان كەيىن قوس سپورتشى اراسىندا توبەلەس باستالىپ, ونى قاۋىپسىزدىك قىزمەتى اجىراتتى.
ۆەرەتەننيكوۆ UFC-دەگى ەكى جەكپە-جەگىندە دە جەڭىلىس تاپتى. جالپى 35 جاستاعى قازاقستاندىقتىڭ كاسىبي رەكوردى – 12 جەڭىس جانە 6 جەڭىلىس.
ال ۆاندەرفورد قاتارىنان ەكىنشى جەڭىسىنە قول جەتكىزدى. 34 جاستاعى امەريكالىقتىڭ ەنشىسىندە 13 جەڭىس جانە 2 جەڭىلىس بار.
