Jańalyqtar
Qazaqstandyq sportshy UFC-de nokaýtpen jeńilip, jekpe-jekten keıin tóbeles shyǵardy
Foto:Chris Unger/Zuffa LLC
Qazaqstandyq aralas jekpe-jek (MMA) sheberi Nıkolaı Veretennıkov UFC aıasynda qatarynan ekinshi jeńilisine ushyrady, dep jazdy qandastar.kz
Sportshy AQSh-tyń Vashıngton shtaty, Sıetl qalasynda ótken Fight Night serııasynyń týrnırinde aldyn ala kard aıasynda óner kórsetti. Onyń qarsylasy – UFC-degi debıýttik jekpe-jegin ótkizgen amerıkalyq Ostın Vanderford, buryn Bellator chempıony ataǵyna úmitker bolǵan.
Jekpe-jek qysqa merzimde kelisilip, aralyq salmaqta (79,4 kg deıin) ótti. Úsh raýndqa josparlanǵan aıqas ekinshi raýndta aıaqtaldy.
Jekpe-jektiń alǵashqy raýndynda-aq Vanderford basymdyqty óz qolyna alyp, parterde qarsylasyna birshama soqqy jasady. Ekinshi raýndta da osy jaǵdaı qaıtalandy. Tóreshi jekpe-jekti toqtatyp, tehnıkalyq nokaýt tirkedi.
Vanderford jeńisin toılap jatqan kezde, Veretennıkov ashýly túrde onyń arqasynan ıterip jiberdi. Osydan keıin qos sportshy arasynda tóbeles bastalyp, ony qaýipsizdik qyzmeti ajyratty.
Veretennıkov UFC-degi eki jekpe-jeginde de jeńilis tapty. Jalpy 35 jastaǵy qazaqstandyqtyń kásibı rekordy – 12 jeńis jáne 6 jeńilis.
Al Vanderford qatarynan ekinshi jeńisine qol jetkizdi. 34 jastaǵy amerıkalyqtyń enshisinde 13 jeńis jáne 2 jeńilis bar.
