قازاقستاندىقتار ەندى ءوزىن قۇمار ويىنداردان 10 جىلعا دەيىن شەكتەي الادى

فوتو: اشىق دەرەككوز

قازاقستاندىقتار ەندى ءوزىن قۇمار ويىنداردان 10 جىلعا دەيىن شەكتەي الادى, دەپ جازدى qandastar.kz

بۇعان دەيىن ازاماتتار ءوزىن قۇمار ويىنداردان 6 ايدان 12 ايعا دەيىنگى مەرزىمگە شەكتەي الاتىن. ەندى بۇل مەرزىم 10 جىلعا دەيىن ۇزارتىلدى. قىزمەتتى eGov mobile قوسىمشاسى ارقىلى پايدالانۋعا بولادى.

اتالعان قىزمەت وتىنىمدەردى وڭدەۋ ۋاقىتىن قىسقارتۋعا جانە ءوزىن قۇمار ويىنداردان شەكتەۋ جۇيەسىن جەڭىلدەتۋگە مۇمكىندىك بەرەدى. بۇل كەز كەلگەن ازاماتقا بارلىق ليتسەنزيالانعان ويىن الاڭدارى مەن ونلاين بۋكمەكەرلىك پلاتفورمالارعا كىرۋدى شەكتەۋگە مۇمكىندىك بەرەدى. قىزمەت تەك 21 جاستان اسقان ادامدار ءۇشىن قولجەتىمدى ەكەنىن اتاپ وتكەن ءجون.

قىزمەتتى پايدالانۋ ءۇشىن مىناداي قادامدار جاساۋ قاجەت:

eGov mobile قوسىمشاسىنا كىرىپ, «قىزمەتتەر» → «سپورت» ءبولىمىن تاڭداڭىز;
«قۇمار ويىندارعا جانە (نەمەسە) ءباس تىگۋگە قاتىسۋعا شەكتەۋ قويۋ» قىزمەتىن تاڭداڭىز;
شەكتەۋدىڭ اياقتالۋ جىلىن جانە ايىن كورسەتىپ, «قىزمەتكە تاپسىرىس بەرۋ» باتىرماسىن باسىڭىز;
وتىنىشكە Face ID/Touch ID ارقىلى قول قويىڭىز.

ءوتىنىش بەرگەننەن كەيىن قولدانۋشى قۇمار ويىندارعا قاتىسۋعا شەكتەۋ قويىلعان تۇلعالار تىزىمىنە اۆتوماتتى تۇردە ەنگىزىلەدى جانە ءوتىنىش كەرى قايتارىلمايدى. بۇعان دەيىن شەكتەۋ قويعاندار ءۇشىن مەرزىمدى ۇزارتۋ مۇمكىندىگى دە بار.

جاڭارتىلعان قىزمەت قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەملەكەتتىك كورسەتىلەتىن قىزمەتتەر كوميتەتى, «ۇلتتىق اقپاراتتىق تەحنولوگيالار» اق جانە تۋريزم جانە سپورت مينيسترلىگى ويىن بيزنەسىن جانە لوتەرەيانى رەتتەۋ كوميتەتىمەن بىرلەسكەن جۇمىسىنىڭ ناتيجەسىندە ەنگىزىلدى.

☑️ ايتا كەتەيىك, بۇگىنگە دەيىن 173 868 ادام ءوزىن قۇمار ويىنداردان شەكتەگەن.