قازاقستاندىقتار Instagram جەلىسى ارقىلى الاياقتاردىڭ الداۋىنا قالاي ءتۇسىپ قالعانىن ايتتى

جەلىدە ساۋدامەن اينالىسىپ, تاۋار ساتاتىن ونلاين دۇكەندەر وتە كوپ. الايدا ولاردىڭ اراسىندا ادال جۇمىس ىستەپ, كوپشىلىكتىڭ سۇرانىسىنا يە بولعاندار دا, “تاۋاردى جىبەرەمىز” دەپ اقشانى العان سوڭ بايلانىسقا شىقپاي, سان سوقتىرىپ كەتەتىندەر دە بار. Stan.kz ءتىلشىسى الاياقتاردى اشكەرەلەپ, ولارعا الدانعانداردىڭ جانايقايىن جەتكىزدى. سونداي-اق ينتەرنەت الاياقتاردان ساقتانۋدىڭ جولدارىن ايتتى. 

باتىس قازاقستان وبلىسىنىڭ تۇرعىنى ايزات ەرجانوۆا ينتەرنەت الاياقتاردىڭ الداۋىنا تۇسكەندەردىڭ ءبىرى. ول Instagram-داعى kidsclo_kz پاراقشاسىنا جازىپ, بالالار كيىمىنە تاپسىرىس بەرگەن. الايدا الاياقتار ونىڭ اقشاسىن الىپ, سان سوقتىرعان.

كوپبالالى انا بالالارىنىڭ جاردەماقىسىن كىشكەنتايلارىنىڭ كيىمىنە جۇمساماق بولعان.

ءسويتىپ Instagram-نان ارزان باعاداعى بالالار كيىمىنە تاپسىرىس بەرىپ, بىردەن تولەم جاسايدى. دۇكەندەگىلەر تاۋاردى كيىمدەرگە تاپسىرىس بەرگەن كۇننىڭ ەرتەڭىندە پوشتا ارقىلى سالىپ جىبەرەمىز دەپ ۋادە ەتكەن. الايدا ولار سول كۇننەن كەيىن مۇلدە بايلانىسقا شىقپاعان.