قازاقستاندىقتاردىڭ دەپوزيتتەرىندە قانشا اقشا بار?

فوتو: اشىق دەرەككوز

قوردىڭ دەرەكتەرىنە سۇيەنسەك, دەپوزيتتىك نارىقتىڭ نەگىزگى بولىگىن قاراپايىم سالىمشىلار قۇرايدى, دەپ جازدى qandastar.kz

قازاقستاندىقتاردىڭ بانكتەردەگى دەپوزيتتەرىنىڭ ورتاشا كولەمى 2024 جىلدىڭ قورىتىندىسى بويىنشا 204 مىڭ تەڭگەنى قۇرادى. بۇل تۋرالى قازاقستاننىڭ دەپوزيتتەرگە كەپىلدىك بەرۋ قورى حابارلادى.

 

وتكەن جىلى حالىقتىڭ بانككە سالعان قاراجاتى 20,3%-عا ءوسىپ, جالپى كولەمى 24,5 ترلن تەڭگەگە جەتتى. سونىمەن قاتار بانكتەردىڭ جالپى اكتيۆتەرى 20%-عا ارتىپ, 62 ترلن تەڭگەنى قۇرادى.

قور مالىمەتىنشە, قازاقستاندىقتاردىڭ باسىم بولىگى جيناقتارىن ۇلتتىق ۆاليۋتادا ساقتاۋدى ءجون كورەدى. 2024 جىلى تەڭگەلىك دەپوزيتتەر 23,8%-عا ءوسىپ, دەپوزيتتىك نارىقتىڭ جالپى 20,3%-عا ۇلعايۋىنا نەگىزگى ۇلەس قوستى. ونىڭ ىشىندە تەڭگەمەن اشىلعان سالىمدار 17,4%-دى, ال شەتەل ۆاليۋتاسىنداعى دەپوزيتتەر 2,9%-دى قۇرادى.

2024 جىلدىڭ 1 قاڭتارىنان باستاپ دەپوزيتتىك مولشەرلەمەلەردى رەتتەۋدىڭ جاڭا جۇيەسى ەنگىزىلدى. بۇعان دەيىن قدكبق بارلىق بانكتەر ءۇشىن ەڭ جوعارى پايىزدىق مولشەرلەمەنى بەلگىلەپ كەلسە, جاڭا جۇيە بۇل شەكتەۋلەردىڭ باسىم بولىگىن الىپ تاستادى. بۇل وزگەرىس بانكتەرگە ءوز مولشەرلەمەلەرىن يكەمدى رەتتەۋگە مۇمكىندىك بەرىپ, سالىمشىلار ءۇشىن باسەكەگە قابىلەتتى جاڭا ۇسىنىستاردىڭ پايدا بولۋىنا ىقپال ەتتى.

قوردىڭ دەرەكتەرىنە سۇيەنسەك, دەپوزيتتىك نارىقتىڭ نەگىزگى بولىگىن قاراپايىم سالىمشىلار قۇرايدى. جەكە تۇلعالارعا تيەسىلى شوتتار بارلىق دەپوزيتتەردىڭ 99,6%-ىن قامتيدى.

«بۇل سالىمدار كوبىنە كۇندەلىكتى تۇتىنۋ مەن كۇتپەگەن شىعىندارعا ارنالعاندىقتان, تاۋەكەلگە تولى ينۆەستيتسيالار قاراپايىم سالىمشىلار ءۇشىن اسا تارتىمدى ەمەس», – دەلىنگەن حابارلامادا.