جاڭالىقتار
قازاقستاندىقتاردىڭ زەينەتاقى جيناقتارى قۇنسىزدانىپ كەتتى مە
![](https://qandastar.kz/wp-content/uploads/2024/05/IMG_5329-4-780x405.jpeg)
سوڭعى 4 ايدا بىرىڭعاي جيناقتاۋشى زەينەتاقى قورىنداعى (بجزق) اكتيۆتەردىڭ كىرىسى 2,87 پايىزعا جەتتى. ال ءبىر جىل ىشىندە ول 8,7 پايىدىق ينفلياتسيا كەزىندە 9,83 پايىز بولدى.
2024 جىلعى 1 مامىرداعى جاعداي بويىنشا بىرىڭعاي جيناقتاۋشى زەينەتاقى قورىندا ساقتالعان زەينەتاقى جيناقتارىنىڭ جالپى سوماسى شامامەن 19 ترلن تەڭگەگە جەتتى. بۇل قاراجاتتىڭ ءبىر بولىگى ءارتۇرلى زەينەتاقى جارنالارى ەسەبىنەن عانا ەمەس, سونىمەن قاتار بجزق اكتيۆتەرىن باسقارۋشىلاردىڭ ينۆەستيتسيالىق قىزمەتى ەسەبىنەن قالىپتاستى. ماسەلەن, بىرىڭعاي جيناقتاۋشى زەينەتاقى قورىنىڭ مالىمەتى بويىنشا, ءتورت ايدا قازاقستاندىقتاردىڭ تازا ينۆەستيتسيالىق كىرىسى شامامەن 517,6 ميلليارد تەڭگە بولدى – بۇل ءبىر جىل بۇرىنعىدان بىردەن 10,4 پايىزعا ارتىق. بۇل رەتتە سالىمشىلاردىڭ شوتتارىنا بولىنگەن مىندەتتى, مىندەتتى كاسىپتىك جانە ەرىكتى جارنالار ەسەبىنەن قالىپتاستىرىلعان زەينەتاقى جيناقتارىنىڭ كىرىستىلىگى 2024 جىلدىڭ 4 ايىندا 2,87 پايىز بولدى.
ال جۇمىس بەرۋشىنىڭ جاڭا مىندەتتى زەينەتاقى جارناسى (جمزج) ەسەبىنەن قالىپتاسقان زەينەتاقى اكتيۆتەرىنىڭ كىرىستىلىگى 1 مامىرداعى جاعداي بويىنشا 1,76 پايىزدى قۇرادى. ەستەرىڭىزگە سالا كەتەيىك, جمزج قازاقستاندىقتاردىڭ شارتتى شوتتارىنا جىل باسىنان ەمەس, اقپان ايىندا تۇسە باستادى, سوندىقتان ولار از ۋاقىت ىشىندە ينۆەستيتسيالانادى.
سونداي-اق ينۆەستيتسيالىق كىرىستى كەم دەگەندە ءبىر جىل ىشىندە باعالاۋ ورىندى ەكەنىن ەستە ۇستاعان ءجون. بۇل جاعدايدا زەينەتاقى اكتيۆتەرى ءوز قۇنىن ساقتاپ قانا قويماي, ينۆەستورلارعا ناقتى پايدا اكەلدى. جىلدىق كىرىستىلىك 8,7 پايىز ينفلياتسياعا قارسى 9,83 پايىز بولدى. ال جيناقتاۋشى زەينەتاقى جۇيەسى قۇرىلعان 1998 جىلدان بەرى ينفلياتسيا 780,79 پايىز بولعان كەزدە جيىنتىق ينۆەستيتسيالىق كىرىستىلىك 842,74 پايىزدى قۇرادى.