Qazaqstanǵa Qytaıdan keletin týrıster sany aıtarlyqtaı ósken

Foto: pixabay.com

Bıyl Qazaqstanǵa Qytaıdan kelgen týrıster sany artqan. Jyldyń 10 aıynda olardyń sany 122 myńnan asqan. Bul týraly Stan.kz aqparat agenttigi habarlaıdy.

EQonaq júıesiniń derekterine sáıkes, bul ótken jylmen salystyrǵanda 64% artyq. Byltyr elge 78 515 qytaılyq kelgen.

Týrızm jáne sport mınıstrliginiń málimetinshe, týrıster sanynyń aıtarlyqtaı ósýine  2023 jylǵy qarashada Qazaqstan men Qytaı arasyndaǵy ózara vızasyz rejımniń engizilýi yqpal etken. Kelisim aıasynda eki eldiń azamattary bir-biriniń aýmaǵynda 30 kúntizbelik kún vızasyz bola alady.

“Qytaıdan keletin týrıstik aǵynnyń ósýi bizdiń elderimizdiń týrızm salasyndaǵy tıimdi ózara is-qımylynyń mańyzdy kórsetkishi. Vızasyz rejımdi engizý jáne avıareıster sanynyń artýy Qazaqstandy qytaılyq týrısterge qoljetimdi ári tartymdy etti. Biz ósip kele jatqan suranysty qanaǵattandyrý jáne týrıstik aǵymnyń qarqyndy ósýin qoldaý úshin týrıstik ınfraqurylymdy damytý jáne servısti jaqsartý boıynsha jumysty jalǵastyramyz”, — dep atap ótti Týrızm ındýstrııasy komıtetiniń tóraǵasy Nurtas Qarıpbaev.

Bıyl týrızm jyly aıasynda elimizdi Qytaıǵa tanytýǵa erekshe kóńil bólinýde. Qytaıdyń iri qalalarynda Qazaqstannyń týrıstik múmkindikterin tanýdy arttyrýǵa baǵyttalǵan 30-dan astam aýqymdy is-sharalar ótkizilgen.