Qazaqstannyń barlyq qalasynda derlik turǵyn úı baǵasy tómendedi

Sońǵy birneshe jylda Qazaqstanda jyljymaıtyn múliktiń quny úzdiksiz ósýde – úsh jyl ishinde qaıtalama turǵyn úı naryǵynda sharshy metrler ortasha eseppen 40 paıyzǵa qymbattady. Dál qazir Qazaqstan baǵa jóninen Táýelsiz Memleketter Dostastyǵyndaǵy (TMD) keıbir elderden de ozyp ketti. Alaıda sáýir aıynda elde kútpegen jaǵdaı boldy – kóptegen qalalarda páter baǵasy tómendedi. «Krysha» portalynyń sarapshylary 18 qalanyń 11-de baǵanyń tómendegenin atap ótti. Baǵa eń kóp tómendegen qala – Almaty. Munda bir aıda baǵa 2,1 paıyzǵa tústi. Degenmen megapolıstegi páterlerdiń ortasha quny burynǵysynsha respýblıka boıynsha eń joǵary – sharshy metri 717 216 teńge. Basqa qalalarda aı saıynǵy tómendeý aıtarlyqtaı baıqalmaıdy: Qaraǵandyda (-1 paıyz), Taldyqorǵan men Aqtóbede (-0,7 paıyzdan), Pavlodar men Qyzylordada (-0,6 paıyzdan), Oral, О́skemen jáne Tarazda (-0,4 paıyzdan), sondaı-aq Shymkent pen Kókshetaýda (-0,1 paıyzdan).

Aqtaýda bir aıda baǵa aıtarlyqtaı ósti – 4,2 paıyzǵa, ortasha eseppen sharshy metri úshin 350 884 teńgege deıin. Bir qyzyǵy, bul qala da jyl saıynǵy kórsetkish boıynsha aldyńǵy qatarda tur. Salystyrý úshin: Almatyda baǵa bir jylda nebári 0,7 paıyzǵa ósse, Astanada 0,6 paıyzǵa, al Shymkentte jalpy alǵanda 3 paıyzǵa tómendegen.