Qazaqstannyń eki oblysynda órt aýmaǵy on ese ulǵaıyp, 31 myń gektarǵa ósti

Foto: vıdeo skrın

Qaraǵandy men Pavlodar oblystaryndaǵy órt aýmaǵy on ese ulǵaıdy. Bul týraly qandastar.kz Stan.kz aqparat agenttigine silteme jasap habarlaıdy.

Tótenshe jaǵdaılar departamenti men oblys ákimdiginiń málimetinshe, qazir Qaraǵandy oblysynda 21 myń gektar, Pavlodar oblysynda 10 myń gektar jer órtke orandy.

Tótenshe jaǵdaılar departamentiniń málimetinshe, saǵat 15:00-ge deıin Qaraǵandy oblysynyń dalasyndaǵy órt 21 myń gektarǵa jetken.

«Saǵat 14:30-da Pavlodar oblysynyń Baıanaýyl aýdanynda jalpy aýmaǵy 10 myń gektardy quraıtyn dala órti oqshaýlandy. Eki oblystaǵy órtti sóndirýge Tótenshe jaǵdaılar departamenti, Tótenshe jaǵdaılar mınıstrligi men basqa da memlekettik organdardan 401 adam jumyldyrylǵan. Olar 68 tehnıka birligin, sondaı-aq úsh ushqyshsyz ushatyn apparat pen 2 MI-8 tikushaǵyn paıdalanady», – delingen habarlamada.

Bir kún buryn Qaraǵandy oblysynyń Qarqaraly aýdanynda qurǵaq shóptiń órtenýinen úlken jalyn sharpydy. Dala órti Pavlodar oblysynyń aýmaǵyna jaıyldy. Odan keıin 3 myń gektardan astam jer órtenip jatqan. Qutqarýshylar qatty jel men taýly jerdiń saldarynan órtti sóndirý qıynǵa soqqanyn habarlady.

Ony sóndirý kezinde bir órt sóndirýshi qaza tapty, taǵy eki adam kúıikpen aýrýhanaǵa jetkizildi.

Oblystyq bılik azamattarǵa aqparattyq-psıhologııalyq qoldaý kórsetý úshin senim telefondaryn ashty:

Qaraǵandy oblysynyń Tótenshe jaǵdaılar departamenti – 8 721 2 51 72 23,

Pavlodar oblysynyń Tótenshe jaǵdaılar departamenti – 8 718 2 20 11 12.