«QAZAQTEŃIZKО́LIKFLOTY KOMPANIIaSY MUNAI TASYMALDAÝDY ARTTYRDY

Qazaqteńizkólikfloty» kompanııasy munaı tasymaldaý kólemin arttyrdy. Byltyr otandyq kemeler 10 mln 778 myń tonna qara altyndy shetelge jetkizdi. Bul, 2022 jylmen salystyrǵanda 1 mln 435 myń tonnaǵa artyq kórsetkish.

Mundaı ózgeriske Kaspıı teńizi arqyly shyǵarýdan bólek munaıdy ashyq teńizderde tasymaldaý oń yqpal etip otyr. Byltyr sáýirde «Aqtaý» tankeri bortyna otandyq ken orny óndirgen munaıdy tıep, Ázerbaıjanǵa baǵyt aldy. Bul, Bakýge 8 jyldan keıingi alǵashqy reıs. Sondaı-aq «QazMunaıGaz» ben «Shevron» arasynda kelissóz júrgizildi. Nátıjesinde, «Qazaqteńizkólikfloty» qoldaýymen Kaspıı qubyr konsorıýmy arqyly Novorossıısk portyna Teńizshevroıl munaıyn tasymaldaý qolǵa alyndy.

Aıdar Orjanov, «Qazaqteńizkólikfloty» UTKQK» JShS Bas dırektory: – Kompanııa munaıdy Kaspıı, Qara teńiz, Jerorta teńizderinde tasymaldaıdy. 2023 jyly «Taraz» jáne «Lıva» tankerin satyp aldyq. Osylaısha flot kemeleri 15-ke jetti. Qazir olar Aqtaýdan Mahachkalaǵa munaı tasymaldaýda. Bıyl «Aqtaý-Baký» baǵytyndaǵy kemelerge qosymsha jabdyq ornatylady.

«QazMunaıGaz» ulttyq kompanııasy men Abu Dhabi Ports Group arasynda áriptestik baılanys myǵym. Taraptar elimizde sý kóligin qurastyryp, jóndeıtin kásipornyn qurýǵa ýaǵdalasty.

Bıyl keme óndirisin qurý múmkindigin zerdeleý jumysy bastalmaq. Kelisim aıasynda «Qazaqteńizkólikfloty» jáne «OFCO Offshore International» kompanııasynyń enshiles uıymdary qazaqstandyq súıretkishterdi jalǵa alýǵa 3 jylǵa kelisimshart jasasty. Aıdar Orjanov, «Qazaqteńizkólikfloty» UTKQK» JShS Bas dırektory: – 2023 jyly 12000 tonnalyq úsh tanker jasaýǵa bastama kóterildi. Jalpy elimizde Saýda floty damýy úshin verf qajet.

Sondyqtan onyń qurylysyn bastaýdy josparlap otyrmyz. Keme kásipornyn qurý teńiz kóligine keshendi qyzmet kórsetýdi qamtamasyz etpek. Sondaı-aq óńir ekonomıkasyn damytyp, jańa jumys oryndaryn ashýǵa oń áserin tıgizedi.