«قازمۇنايگاز» باسشىسى Caspi Bitum, اتىراۋ زاۋىتتارىندا مۇناي ونىمدەرىن ءوندىرۋ جانە جونەلتۋ بويىنشا جيىن وتكىزدى

«قازمۇنايگاز» ۇك اق ء(ارى قاراي – قمگ) باسقارما باسشىسى ماعزۇم مىرزاعاليەۆ اتىراۋدا كوشپەلى كەڭەس وتكىزدى. وندا ىشكى نارىقتى جول بيتۋمىمەن قامتاماسىز ەتۋ, اتىراۋ مۇناي وڭدەۋ زاۋىتىندا مۇناي ونىمدەرىن ءوندىرۋ جانە جونەلتۋ, زاۋىتتى جوندەۋ مەرزىمى تالقىلاندى. جينالاسقا قازمۇنايگاز, ءاموز جانە Caspi Bitum اقتاۋ بيتۋم زاۋىتىنىڭ باسشىلىعى قاتىستى.

«كەشە مەملەكەت باسشىسى قازاقستان حالقىنا جولداۋىندا جول-قۇرىلىس جۇمىستارى ماۋسىمىندا ىشكى نارىقتا بيتۋم تاپشىلىعىنا قاتىستى ءادىل سىن ايتتى. سەرىكتەستەرمەن جانە مۇددەلى مەملەكەتتىك ورگاندارمەن بىرلەسىپ, قالىپتاسقان جاعدايدى وزگەرتۋ بويىنشا تۇبەگەيلى شارالار قابىلداۋ قاجەت», – دەپ اتاپ ءوتتى م.مىرزاعاليەۆ.

جيىن بارىسىندا ايتىلعانداي, قازاقستاندا بيتۋمعا دەگەن سۇرانىس جاز ايلارىندا جول قۇرىلىسى بەلسەندى جۇرگىزىلەتىن شاقتا ارتا تۇسەدى. وسىعان بايلانىستى, م.مىرزاعاليەۆ «قازمۇنايگازدىڭ» جاۋاپتى قۇرىلىمدىق بولىمشەلەرىنە ۋاكىلەتتى مەملەكەتتىك ورگاندارمەن جول-قۇرىلىس ۇيىمدارىن مەملەكەت تاراپىنان جىل بويى قارجىلاندىرۋ (اۆانس بەرۋ) مۇمكىندىگىن تالقىلاۋدى تاپسىردى. بۇل جول-قۇرىلىس جۇمىستارى ماۋسىمىنىڭ باستالۋىنا قاراي ىشكى نارىقتا بيتۋمنىڭ قاجەتتى قورىن جيناقتاۋعا مۇمكىندىك بەرەدى.

سونىمەن قاتار, جيىندا Caspi Bitum زاۋىتىنىڭ قۋاتىن 1,5 ەسە ارتتىرۋ ماسەلەسى تالقىلاندى. بۇل جوعارى ساپالى بيتۋم ءوندىرىسىن جىلىنا 750 مىڭ تونناعا دەيىن ۇلعايتۋعا مۇمكىندىك بەرەدى. Caspi Bitum  كەلتىرگەن دەرەك بويىنشا, مۇناي وڭدەۋ كولەمىن ۇلعايتۋعا مۇمكىندىك بار, ونىڭ الدىن الا تەحنيكالىق-ەكونوميكالىق نەگىزدەمەسى ازىرلەنىپ تە قويعان, ماماندار جوبالاۋعا كىرىسىپ جاتىر.

جيىن بارىسىندا سونداي-اق اتىراۋ مۇناي وڭدەۋ زاۋىتىنىڭ باسشىلىعى كاسىپورىننىڭ تۇراقتى جۇمىس ىستەپ تۇرعانىن, وندىرىستىك كورسەتكىشتەر ۋاقتىلى ورىندالىپ جاتقانىن باياندادى. بيىلعى جىلدىڭ  قورىتىندىسى بويىنشا زاۋىتتا مۇناي وڭدەۋ كولەمى 5 ملن توننادان اسپاق. جانار-جاعارماي نارىعىنداعى جاعدايدى تۇراقتاندىرۋ ءۇشىن اتىراۋ مۇناي وڭدەۋ زاۋىتىنىڭ قىركۇيەككە جوسپارلانعان جوندەۋ جۇمىسىن كەيىنگە اۋىستىرۋ ماسەلەسى پىسىقتالىپ جاتىر. بۇل رەتتە م.مىرزاعاليەۆ زاۋىت باسشىلىعىنا جانار-جاعارماي نارىعىنداعى قازىرگى جاعدايدى ەسكەرە وتىرىپ, زاۋىتتىڭ اعىمداعى جوندەۋ جۇمىسىن كەيىنگە اۋىستىرۋ بويىنشا دايىندىق جۇمىستارىن جۇرگىزۋدى تاپسىردى.

انىقتاما ءۇشىن:

بيتۋم ءوندىرۋ بويىنشا «قازمۇنايگاز» ۇك اق زاۋىتتارىنىڭ ەڭ جوعارى قۋاتى جىلىنا 800-850 مىڭ تونناعا دەيىن جەتەدى. (Caspi Bitum – 500 مىڭ توننا جانە پاۆلودار مۇناي وڭدەۋ زاۋىتى – 350 مىڭ توننا).

Caspi Bitum اقتاۋ زاۋىتى كەز كەلگەن كليماتتىق جاعدايدا ۇزاق ۋاقىت بويى ساقتالىپ, پايدالانۋعا بولاتىن بيگ-بەگ دەپ اتالاتىن ءىرى وندىرىستىك قاپشىقتارعا ولشەپ سالىنعان بيتۋمدى وندىرە الادى.