Keler jyldan bastap shtattan tys isteıtin qyzmetkerler dekretke shyǵyp, áleýmettik tólem ala alady

Foto: ashyq derekkóz

2025 jyldan bastap kelisimshartpen jumys isteıtin azamattardyń quqyǵy shtattaǵy resmı qyzmetkerlermen teń bolady. Bul týraly  qandastar.kz  Stan.kz aqparat agenttigine silteme jasap habarlaıdy.

Endi jumys berýshiler shtattan tys qyzmetkerleri úshin de áleýmettik tólemder aýdaryp, dekrettik demalys, jumyssyzdyq boıynsha járdemaqy men memlekettik áleýmettik saqtandyrý qorynan tólenetin ózge de tólemderdi óteıdi.

Bul jańashyldyq azamattyq-quqyqtyq sıpattaǵy shart boıynsha jumysqa turǵan árbir qazaqstandyqqa qatysty. Bastama osydan 2 jyl buryn qolǵa alynǵan.

Áleýmettik kodekstegi ózgertýler endi 2025 jyldyń 1 qańtarynan bastap kúshine enýi tıis. Aıta ketsek, ázirge shtattan tys qyzmetkerlerge memlekettik áleýmettik saqtandyrý qorynan tólemder aýdarylmaıdy.