«كەشىرىم سۇرايمىن»: «ۇرىعى جوق» دەگەن دارىگەر ەلدوس «كولوبوكتان» كەشىرىم سۇرادى

فوتو: ۆيدەودان سكرينشوت

«ەكومەد» كلينيكالار جەلىسىنىڭ نەگىزىن قالاۋشى رەپرودۋكتولوگ سالتانات بايقوشقاروۆانىڭ ءسىڭىلىسى پەريزات بايقوشقاروۆا ءوزىنىڭ الەۋمەتتىك جەلىدەگى پاراقشاسىندا ازىلكەش ەلدوسپەن ايەلىنەن كەشىرىم سۇرادى, دەپ حابارلايدى Qandastar.kz.

بۇعان دەيىن پەريزات بايقوشقاروۆانىڭ «ەلدوستىڭ ۇرىعى بولماعان» دەپ ايتقانى جەلىدە تاراپ, ەلدوس پەن جۇبايى ءوز رەنىشتەرىن بىلدىرگەن ەدى.

«اينالايىن ەلدوس, تاڭشولپان! سىزدەردىڭ قول جەتكىزگەن ناتيجەلەرىڭىزگە بۇكىل ەل قۋانىپ جاتىر. استانا قالاسىنداعى كلينيكامىزعا, سونداي-اق الماز قۇرمانالي ۇلى مەن ازامات ساندىباي ۇلىنا ۇلكەن العىس ايتىپ جاتقاندارىڭىزعا شىن جۇرەكتەن ريزامىز. باسقا ەلدەردە وتا جاسالىپ, ناتيجە بولماي جاتسا دا, استاناداعى ورتالىقتا ءساتتى وتا جاسالىپ, ۇرىق تابىلىپ, ەمبريون دايىندالىپ, جۇكتىلىككە قول جەتكىزدىك. ودان بولەك, قالعان بيوماتەريال دا ارنايى ساقتاۋلى تۇر.

وسىنداي كەرەمەت ناتيجەلەرگە سەبەپكەر بولعان ەڭ وزىق تەحنولوگيالاردى بارشا حالىققا قولجەتىمدى ەتۋ ماقساتىندا, باسشىلارىمىز استانا, الماتى, شىمكەنت, اقتوبە جانە اتىراۋ قالالارىنداعى ورتالىقتارعا قويدى.

مەن تەك وسىنى جەتكىزگىم كەلگەن ەدى.

الايدا ايتىلعان ءبىر اۋىز ءسوزىم كەيبىر جۇرەكتەرگە اۋىر تيگەنىن ەستىپ, جۇرەگىم الاڭ. بۇل ءسوز ەشكىمدى رەنجىتۋ ءۇشىن ەمەس, كەرىسىنشە, ءۇمىت سىيلاۋ ءۇشىن ايتىلعان ەدى…

ءيا, ەلدوس باۋىرىم بۇرىنىراق حابارلاسقان. ول كەزدە, وكىنىشكە قاراي, بىزدە ونداي تەحنولوگيا بولماعان. ال بۇگىنگى تاڭدا — بار.

بۇل — مەنىڭ جەكە پىكىرىم. ەلدوس دۇرىس ايتتى: ء“بارى دارىگەر ەمەس.” ال مەن دە جۋرناليست ەمەسپىن. سوندىقتان كەي سوزدەرىم بۇرمالانىپ, تولىق جەتكىزىلمەگەن بولۋى مۇمكىن. سوعان شىن جۇرەكتەن كەشىرىم سۇرايمىن.

ەلدوس پەن تاڭشولپاننان, سونداي-اق بارشا قازاق ەلىنەن كەشىرىم سۇراي وتىرىپ, وسى ۆيدەومەن ارادا تۋىنداعان تۇسىنىسپەۋشىلىككە نۇكتە قويۋدى ءجون كوردىم.

تاڭشولپان امان-ەسەن جەڭىلدەپ, ەلدوس ەكەۋى كوپتەن كۇتكەن ءوز سابيلەرىن قۇشاعىنا الىپ, شاڭىراقتارىندا ۇلكەن قۋانىش تويى بولسىن دەپ شىن جۇرەكتەن تىلەكتەسپىن! بۇل – جۇرەكتەن شىققان ۇندەۋ.

قابىل الساڭىزدار – راقمەت.
جۇرەكپەن تۇسىنسەڭىزدەر – مىڭ العىس», — دەپ جازدى ول.