جاڭالىقتار
كيبەرقىلمىستىڭ 99%-ى ينتەرنەت الاياقتىقپەن بايلانىستى
بيىل 3645 ينتەرنەت-الاياقتىق دەرەگى تىركەلدى.
سپيكەردىڭ سوزىنشە, كيبەرقىلمىستارعا اقپاراتقا زاڭسىز قول جەتكىزۋ, ونى جويۋ, وزگەرتۋ, بۇعاتتاۋ; زياندى باعدارلامالاردى قۇرۋ جانە پايدالانۋ; ينتەرنەت جەلىسىندە پورنوگرافيانى تاراتۋ; اۆتورلىق قۇقىقتى بۇزۋ جانە ەلەكتروندىق جىمقىرۋ, اقپاراتتىق تەحنولوگيالاردى پايدالانا وتىرىپ جاسالاتىن باسقا دا قىلمىستار جاتادى.
«بارلىق كيبەرقىلمىستىڭ 99%-ى – ينتەرنەت الاياقتىق. قازىر اتالعان قىلمىس تۇرىمەن بارلىق ەل, سونىڭ ىشىندە اقپاراتتىق تەحنولوگيالار سالاسىندا دامىعان مەملەكەتتەر دە زارداپ شەگىپ وتىر. سوڭعى 7 جىلدا قازاقستاندا ولاردىڭ سانى 10-نان استام ەسەگە ءوستى. مۇنداي قىلمىستار وتكەن جىلى تىركەلگەن قىلمىستاردىڭ جالپى سانىنىڭ 19%-ىن جانە بارلىق الاياقتىق دەرەگىنىڭ 50%-ىن قۇرايدى. بىلتىر ازاماتتارعا 21 ملرد تەڭگەگە زالال كەلدى», — دەدى ءىىم وكىلى ماجىلىستە وتكەن كوميتەت وتىرىسىندا.
بيىل 3645 ينتەرنەت-الاياقتىق دەرەگى تىركەلدى. بۇل جالپى قىلمىستىڭ 18%-ىن جانە بارلىق الاياقتىق دەرەگىنىڭ 43%-ىن قۇرايدى.
«4 مىڭ ينتەرنەت-الاياقتىققا قاتىسى بار 2 مىڭعا جۋىق ادام ۇستالىپ, جاۋاپقا تارتىلدى. جابىرلەنۋشىلەرگە 850 ملن تەڭگە كولەمىندە زالال وتەلدى», — دەدى ۆيتسە-مينيستر.
ايدوس رىسباەۆتىڭ دەرەگىنشە, نەگىزىنەن مۇنداي قىلمىستار شەتەلدەن نەمەسە شەتەلدىك ينتەرنەت-رەسۋرستاردى پايدالانۋ ارقىلى جاسالادى.
«انونيمدىلىگىن قامتاماسىز ەتۋ ءۇشىن حاكەرلەر ءوز قۇرباندارى رەتىندە شەتەل ازاماتتارىن تاڭدايدى. مىسالى, 2023 جىلدىڭ سوڭىندا استانادا 4 الاياقتىق call-ورتالىق انىقتالدى. ولاردىڭ قىزمەتكەرلەرى تەك شەتەلدىك نومىرلەرگە قوڭىراۋ شالعان. قازاقستاندىقتارعا قاتىستى وسىنداي قىلمىستار دا شەتەلدەن جاسالادى», — دەپ اتاپ ءوتتى ول.
