جاڭالىقتار
«كىم ول سونشاما»: دەپۋتات قتج-نىڭ باسقارما توراعاسىن سىنعا الدى
بۇگىن ءماجىلىس وتىرىسىندا دەپۋتات ەدىل جاڭبىرشين كومپانيانىڭ ەسەبى تىڭدالعان ساتتە پارلامەنتكە كەلمەگەن قتج باسشىسى نۇرلان ساۋرانباەۆتى سىنعا الدى,-دەپ حابارلايدى Qandastar.kz
«بۇگىن پارلامەنتتە قتج-عا كوپتەگەن سۇراق بولدى. بىراق قتج-نىڭ پرەزيدەنتى جوق. ساۋرانباەۆ دەگەن كىم ول? نەگە كەلمەيدى? پارلامەنتتە جۇمىس ىستەگەنىمە ءۇش جىل بولدى, ول ءومىرى كەلگەن ەمەس. قايتا-قايتا وسى ماسەلە كوتەرىلەدى, ساۋرانباەۆ كەلمەيدى. نە قىلعان ادام ول? قتج-دا جەمقورلىق بىلىعىپ جاتىر, ول مۇندا كەلىپ جاۋاپ بەرمەيدى, ورىنباسارلارىن جىبەرەدى. QazaqGaz-دى قاراعان كەزدە, باستىعى كەلدى, «سامۇرىق-قازىنانى» قاراعان كەزدە, باستىعى كەلدى.
ال نەگە قتج-نىڭ باستىعى كەلمەيدى? كىم ول سونشاما? سۇراق بار. بارلىعىن شەشەتىن كادر. تەمىرجولشىلار تۇرىپ جاتقان بۋدكاسىن قاراڭىزدار. ون توعىزىنشى عاسىرداعى بۋدكالار.
ۇيات ەمەس پە? قتج-نىڭ پرەزيدەنتى ءبىر رەت تە تەمىرجولشىلارمەن كەزدەسكەن جوق. ولاردىڭ ماسەلەسىن تىڭداعان جوق. قانشا ەرەۋىل بولدى, بىرەۋىنە دە بارعان جوق. كىم ول سونشاما? دەپۋتاتتان مىقتى ما ول سونشاما? بۇل دەگەن دۇرىس ەمەس», – دەدى جاڭبىرشين.
سونداي-اق دەپۋتات قازاقستان مەن رەسەي تەمىرجول تاسىمالىنىڭ تابىسىن سالىستىردى. «ولاردىڭ 2023 جىلعى كورسەتكىشتەرى – 737 ملرد رۋبل, ءبىزدىڭ اقشامىزعا شاقساق, 3,7 ترلن. ولاردا امورتيزاتسيا, سالىق ت.ب. الماعان كەزدەگى كىرىس وسىنداي. ءبىزدىڭ قتج-دا 3 ترلن قارىز بار», – دەيدى دەپۋتات.
جاڭبىرشين «بارلىق قازاقستاندىق ۇلتتىق كومپانيانى پارلامەنتكە شاقىرىپ, اقشانى قايدا جۇمساپ جاتقانىن سۇراۋ كەرەك» دەگەن ۇسىنىس ايتتى. «مەندە مىنانداي ۇسىنىس بار. پارلامەنتكە قتج-نى شاقىرىپ, بۇكىل ماسەلەسىن مايشاممەن قاراۋ كەرەك. مەملەكەتتىڭ قارجىسىن الا بەرەدى. باسقا جەرگە اقشا جەتپەي جاتقان كەزدە ءبىز سوعان قۇيا بەرەمىز. ال ولار قارىزعا باتىرا بەرەدى. ونداي مەنەدجەرلەردى جوق قىلۋ كەرەك…
نەگە مۇندا باسقا ۇلتتىق كومپانيالاردى شاقىرمايمىز? «قازمۇنايگازدى» شاقىرايىق, «قازاتومپرومدى» شاقىرايىق. كونستيتۋتسيا بويىنشا, ەلدىڭ بايلىعى حالىقتىكى ەمەس پە? شاقىرىپ, اقشانىڭ ءبارى قايدا كەتىپ جاتقانىن تىڭدايىق. بونۋستارى, ەڭبەكاقىلارى, ۇيلەرى, كولىكتەرى قانداي ولاردىڭ? ول ەلدىڭ اقشاسى. سوندىقتان «قتج» كۇزدەگى سەسسياعا پارلامەنتكە دايىندالىپ كەلسىن. ولار قاشانعى حالىقتىڭ بايلىعىن قالتاسىنا باسىپ, شالقىپ جۇرەدى? حالىقتىڭ جاعدايىن قاشان ويلايمىز ءبىز? ولاردىڭ وتىرىگىنە سەنىپ وتىرا بەرەمىز بە? ولاي بولمايدى» – دەدى جاڭبىرشين. ول قاجەت بولسا, پارلامەنتتە وسى ماسەلە بويىنشا كوميسسيا قۇرۋ كەرەك ەكەنىن ايتتى.
