جاڭالىقتار
«كىناسىزدىگىمدى دالەلدەيمىن, بولماسا ولەمىن»: ۆيتسە-ادميرال جانۇزاقوۆ سوتتالعاندا قانداي كۇيدە بولعانىن ايتتى
فوتو: اشىق دەرەككوز
Adal ADAM youtube ارناسىنا قر اسكەري-تەڭىز كۇشتەرىنىڭ ۆيتسە-ادميرالى جانداربەك جانۇزاقوۆ سۇحبات بەردى. ول 2020 جىلى سوتتى بولعاندا ادىلەتسىزدىككە شىداماعانىن جەتكىزدى, – دەپ حابارلايدى qandastar.kz.
«مەن سوت ۇكىمىمەن كەلىسپەدىم. دالەلدەرىمدى ۇسىندىم. كىنالى ەمەس ەكەنىمدى ايتتىم. اقشا المادىم, زاڭ بۇزبادىم دەدىم. سوعان نارازىلىق رەتىندە 42 كۇن اشتىق جاريالادىم. مەنى سيزو قىزمەتكەرلەرى ەكى كامەرادان باقىلاپ قاراپ وتىردى. 42 كۇن تاماق ىشپەدىم, سونىڭ ەكى اپتاسىندا مۇلدە ءنار تاتپادىم. سۋ دا ىشپەدىم. 27 كەلى سالماق تاستادىم. سوسىن پروكۋرور, ادۆوكات كەلدى. سيزو-نىڭ باستىقتارىن دا ايادىم, ولار ماعان «ءبىزدى جۇمىستان الىپ تاستايمىز دەپ تىنىشتىق بەرمەي جاتىر» دەدى. ءسويتىپ 42 كۇننەن كەيىن اشتىقتى توقتاتتىم», – دەدى جانداربەك جانۇزاقوۆ.
ۆيتسە-ادميرالدىڭ ايتۋىنشا, كەمەلەردى جالعا قويۋ بويىنشا كەلىسىم-شارتتىڭ زاڭدىلىقتارىن 5 اي بويى پىسىقتاپ, قورعانىس ءمينيسترىنىڭ ورىنباسارى مەن دەپارتامەنت باسشىلارى, اسكەري پروكۋرورعا دەيىن قولدارىن قويدىرىپ, رۇقسات العان. ءبارى زاڭدى بولسا دا ءوزىن عانا ايىپتى عىپ, سوتتى قىلعانىن جەتكىزدى. قورعانىس ءمينيسترى, مينيسترلىكتىڭ زاڭگەرى اراشا تۇسپەي, تەرگەۋشىلەردىڭ تالكەگىنە تاستاپ جىبەرگەنىن دە اشىنا ايتتى.
«مەنى ادىلەتسىزدىككە تولە المادىم. كىناسىز ەكەنىمدى دالەلدەيمىن, نە بولماسا مەن ولەم دەدىم», – دەپ ەسكە الدى باسىنا تۇسكەن قيىن-قىستاۋ كەزەڭدى.
ايتا كەتەيىك, جانداربەك جانۇزاقوۆ قر قك اسكەري-تەڭىز كۇشتەرىنىڭ باس قولباسشىسى بولىپ تۇرعاندا 2020 جىلى 6 جىلعا باس بوستاندىعىنان ايىرىلعان بولاتىن. سوت ونى كونكۋرس وتكىزبەستەن كەمەلەردى بايلاۋ قىزمەتتەرىن ساتىپ العانى ءۇشىن كىنالى دەپ تاپتى: ءبىرىنشى ساتىداعى ۇكىمگە سايكەس, ۆيتسە-ادميرال ءوز ارەكەتتەرىمەن مەملەكەتكە 30 ملن تەڭگەگە جۋىق شىعىن كەلتىرگەن. ۇكىممەن كەلىسپەگەن جانۇزاقوۆ 42 كۇن اشتىق جاريالادى. ال 2023 جىلى اقپاندا جوعارعى سوت وعان اقتاۋ ۇكىمىن شىعاردى. ۆيتسە-ادميرالعا اسكەري شەنى, وردەندەرى قايتارىلدى.
