Kıno kórýge barǵan búldirshinderge jynystyq qatynasy bar fılmder jarnamalanǵan

Foto: istockphoto.com

Túrkistanda kıno kórýge barǵan búldirshinderge jynystyq qatynasy bar fılmderdiń jarnamasy kórsetilgen. Bul týraly jeli qoldanýshy Moldııar Ergebekov Facebook paraqshasynda jazdy, dep habarlaıdy Azattyq Rýhy.

Ol Túrkistandaǵy Hadısha plaza kınoparktyń áreketin qatań synǵa aldy.

«8 jasar qyzymmen birge mýltfılm kórý úshin Kınopark kınoteatr jelisiniń Túrkistandaǵy fılıalyna bardyq (Hadısha plaza kınopark). Árbir fılm kórsetilmesten buryn jaqynda kórsetilimge kiretin fılmderdiń jarnama rolıkteri júredi, 10 mınýttaı. Balalarǵa arnalǵan seansta eresekterge arnalǵan fılmderdiń jarnamasy júrdi. Al fılm jarnamalary árdaıym fılmniń eń dramalyq, eń tragedııalyq nemese eń kúlkili sahnalaryn qoldanady. 10 mınýttyń ishinde kishkentaı ǵana qyzym árbáleni kórdi: jynystyq qatynasy bar sahnalar, asylyp óleıin dep jatqan adam, úı ishindegi asa qatygez zorlyq-zombylyq jáne taǵy basqa… Bul óte sumdyq jaǵdaı. Balalarǵa arnalǵan seansta tek balalarǵa arnalǵan kontenttiń jarnamasy júrýi kerek», – dep jazdy M. Ergebekov.

Ol óz sózinde kınopark jáne taǵy basqa kınoteatr jelileri buny bilmese Mádenıet jáne aqparat mınıstrligi olarǵa aıtyp mindetteýi kerek ekenin atap ótti.

«Qyzymdy áńgimege aınaldyryp qorqynyshty sahnalardy kórýden aýlaq ustaýǵa tyrystym, alaıda kınoteatrda buny jasaý múmkin emes. Elimizde sýııd jasaý jasy búldirshin jastaǵylarǵa deıin tómendegen myna zamanda, mundaı qorqynyshty oqıǵalardyń sebepteriniń birin osynaý 10 mınýttyq jarnama rolıkterinen de izdeýge bolady dep oılaımyn. Qadirmen oqyrmandarym, bul sumdyqty bárimiz birigip toqtataıyq. Bul jaǵdaıǵa ún qosyńyzdar! Balalardyń psıhıkalyq jáne fızıologııalyq deniniń saý bolýy biz eresekterge baılanysty ekenin umytpaıyq», – dep jazdy ol.