«كلۋبتا ءىشىپ ءجۇردى». «اسار-ۋمە» قورىنىڭ ەرىكتىسى سالتاناتتىڭ وتباسىنان كەشىرىم سۇرادى

فوتو: ۆيدەودان سكرين

«اسار-ۋمە» قايىرىمدىلىق قورىنىڭ ەرىكتىسى ەلجاس شورا وسىعان دەيىن سالتانات نۇكەنوۆا كۇيەۋىن ءوزىن ولتىرۋگە يتەرمەلەگەنىن ايتىپ, باسى داۋعا قالعان بولاتىن. ەندى ول وسى ءسوزى ءۇشىن مارقۇمنىڭ وتباسىنان كەشىرىم سۇرادى, دەپ حابارلايدى qandastar.kz     Skifnews.kz اقپارات پورتالىنا سىلتەمە جاساپ.

«وسىدان 3-4 كۇن بۇرىن مارقۇم سالتانات تۋرالى ويىمدى ءبىلدىرىپ, پىكىر قالدىرعان ەدىم. شامالى ۋاقىتتان كەيىن ونىڭ قاتە ەكەنىن ءتۇسىنىپ, بىردەن ءوشىرىپ تاستادىم. بىراق وقىرمان سكرينشوت جاساپ, جان-جاققا تاراتىپ ۇلگەرىپتى. حالىق مەنى بيشىمباەۆتى قولدايدى دەپ وتىر. بىراق ولاي ەمەس, نيەتىم باسقا بولدى. مەن «اسار-ۋمە» قورىنىڭ قىزمەتكەرى ەمەسپىن, ەرىكتىسىمىن. بۇل قاتەلىگىمنىڭ, جازعانىمگىڭ قورعا ەشبىر قاتىسى جوق. نارازىلىقتار مەنىڭ تاراپىما بولسا دەيمىن. سالتاناتتىڭ وتباسى جانە «اسار-ۋمە» قورىنان كەشىرىم سۇرايمىن», – دەيدى ەلجاس شورا.

ايتا كەتەيىك, «اسار-ۋمە» اتتى قايىرىمدىلىق قوردىڭ ەرىكتىسى ەلجاس شورا تۇرمىستىق زورلىق-زومبىلىقتان قازا تاپقان سالتانات نۇكەنوۆانى «كلۋبتاردا ماس بولىپ جۇرگەن, كۇيەۋىن ءوزىن ولتىرۋگە يتەرمەلەگەن» دەپ قارالاپ, باسى داۋعا قالدى.

«وكىنىشكە قاراي, اراق-شاراپ ىشەتىن, تەمەكى شەگەتىن ايەل كىسىلەر بار. كلۋبتا ىستەيتىن تانىس جىگىت سالتانات ءمينيستردىڭ ايەلى بولا تۇرا قىسقا كويلەك كيىپ, ماس بولىپ, كلۋبتاردا جۇرەتىن دەيدى. اللاھ كەشىرسىن, قاتتى ايتسام, اقيقاتتى ايتۋ كەرەك. ارينە بۇل اجال. وسى ولىمگە كۇيەۋىن يتەرمەلەگەن سالتاناتتىڭ ءوزى دەپ ويلايمىن… سالتاناتتىڭ جاعدايى بارشا ايەلگە ساباق بولسىن», – دەپ جازعان ول.

قازاقستاندىق ازامات وسى جازباسىمەن «ايەلدەردى اقىلدى بولۋعا» شاقىرىپتى-مىس.

سالتانات نۇكەنوۆانىڭ اعاسى ايتبەك امانگەلدى بۇل جازبانى سىنادى. ول قارجى نارىعىن رەتتەۋ جانە دامىتۋ اگەنتتىگىنەن اسار-ۋمە قايىرىمدىلىق قورىنا تەكسەرىس جۇرگىزۋدى سۇراعان. جەلى قولدانۋشىلارى ايتبەك امانگەندىنى قولداپ, ونىڭ جازباسىن ءبولىسىپ جاتىر.