Jańalyqtar
QMDB meshitte aıaǵyn ýqalatqan ımamǵa úndeý jasady
Foto:skrın
Atalǵan oqıǵaǵa qatysty QMDB málimdeme jasady, dep habarlaıdy qandastar.kz
Bul týraly dinı basqarmanyń baspasóz hatshysy Aǵabek Qonarbaıuly Facebook-tegi paraqshasynda jazǵan. Ol qulshylyq úıine kelgen árbir adam meshit ádebin saqtaýy tıis ekenin eskertedi.
«Meshit – qulshylyq úıi, jamaǵat jınalatyn rýhanı orda, qasıetti meken, tárbıe orny. Qulshylyq úıine kelgen adam meshit ádebin saqtaýy tıis. Bul – musylmannyń kórkem mineziniń biri. Túrkistan oblysy, Saryaǵash aýdanyndaǵy meshitte bolǵan oqıǵa áleýmettik jelilerde tarap, qoǵamnyń túrli pikir qaıshylyǵyn týdyrdy. Osyǵan oraı, Qazaqstan musylmandary dinı basqarmasy qasıetti orynda qoǵam narazylyǵyn týdyrǵan áreketke jol bergeni úshin meshit ımamyna eskertý jasady. Qazaqstan musylmandary dinı basqarmasy elimizdegi barsha musylman jamaǵatyn qulshylyq úılerinde daýys kóterip sóılemeýge, ádepsiz áreketterge jol bermeýge, urys-keris jasamaýǵa shaqyrady. Jamaǵatty barynsha meshit ádebin saqtaýǵa úndeımiz», – dedi ol.
Buǵan deıin oqıǵanyń Saryaǵash aýdanyndaǵy meshitte bolǵany naqtylanǵan edi. Vıdeodan ýaǵyz aıtyp otyrǵan aqsaqaldyń aıaǵyn 3 balanyń ýqalaǵanyn baıqaý qıyn emes. Buǵan kópshilik narazylyǵyn ashyq bildirgen bolatyn.
