Qoǵam belsendisi Almaty kóshelerine tóselgen brýschatkanyń jeke qolǵa satylyp jatqanyn áshkereledi

Foto: Vıdeodan skrın

Almatyda 2022 jyly tóselgen jańa ári sapaly brýschatkanyń qaıta alynyp, ornyna dál sondaı tastyń tóselýi qoǵamda úlken daý týǵyzdy. Belgili qoǵam belsendisi Sanjar Boqaev jarııalaǵan vıdeoda alynǵan brýschatkanyń bir bóligi qala mańyndaǵy Jandosov aýylyna áketilip, tipti satylyp ketken, dep jazdy qandastar.kz

Ol bul áreketti «urlyq» dep baǵalap, ákimdik pen merdiger kompanııanyń kelisim arqyly bıýdjet qarjysyn talan-tarajǵa salǵanyn ashyq málimdedi. Boqaev bul isti burynǵy ákim Erbolat Dosaevtyń josparymen baılanystyrdy. Osy jaǵdaıǵa baılanysty Stan.kz Almaty ákimdiginen resmı túsinikteme suratty.

Qoǵam belsendisi Sanjar Boqaevtyń vıdeosynda 27 tamyz kúni tańǵy saǵat 08:19-da turǵyndardan qaladaǵy jańa brýschatkanyń sheshilip, qaıtadan jańa brýschatka tóselip jatqany týraly habar túskeni aıtylady. Sol jerde Sanjar Boqaev polıııaǵa habarlasyp, shaqyrǵan. Júk kóligi arqyly brýschatka júk kóligine tıelip, qala syrtyndaǵy Jandosov aýylyna jetkizilgen. Onda brýschatka jeke úıdiń aýlasyna túsirilip jatqan kezde túsirilim júrgizilgen. Sanjar Boqaevtyń aıtýynsha, ákelingen brýschatka múlde búlinbegen, tipti jańa kúıinde bolǵan. Árbir tas bútin, eshbir jerinde syzat nemese jaryq joq.

Qoǵam belsendisi bul áreketti «zańsyz áketý, urlyq» dep baǵalap, júk túsirilip jatqan jerge taǵy da polıııa men tergeý-jedel tobyn shaqyrǵan.

“Bul brýschatka qaladaǵy kóshelerden alynǵanymen, ony aýystyrýdyń eshqandaı qajettiligi bolmaǵan. Sebebi tastar sapaly kúıinde saqtalǵan, kem degende taǵy bes jyl paıdalanýǵa jaramdy edi. Osy jumystarǵa jarty mıllıard teńge bólingen. Belgilengen «abattandyrýdyń» esh qosymsha qundylyǵy joq, kerisinshe bıýdjet qarajaty orynsyz jumsalyp otyr. Ár jyly bıýdjette shamamen bes trıllıon teńge tapshylyq baıqalady. Memleket azııalyq jáne eýropalyq bankterden qaryz alýǵa májbúr. Soǵan qaramastan, qalada jańa tóselgen brýschatkany qaıta alyp tastap, ornyna taǵy jańa brýschatka tósep jatqan jaıt tirkeldi. Alǵashqy tosynnan júrgizetin tekserýden keıin ekinshi manıpýlıator da brýschatka tıep keldi. Biraq jaǵdaıdan habardar bolǵan soń ol Shamalǵan aýylynda júktiń bárin túsirmeı, qaıtadan qalaǵa, Áıteke bı kóshesindegi ákimdiktiń qoımasyna apardy», – dedi Sanjar Boqaev.

Sanjar Boqaev óziniń taǵy ańdyp bara jatqanyn baıqap, ekinshi jetkizý kóligi qaıta ketkenin aıtady. Onyń sózinshe, tas Shamalǵanǵa jetkizilgende, onyń satylýy ábden múmkin edi.

«Bul áreketti «zańsyz áketý, urlyq» dep baǵalandy. О́ıtkeni brýschatka nebári eki jyl buryn tóselgen, ol áli de sapaly kúıinde turǵan. Alaıda ákimdikten eshqandaı defekt aktisi jasalmaǵan. Mundaı qujatty aýdandyq ákimdiktiń abattandyrý bóliminiń basshysy men merdiger qol qoıýǵa tıis edi», – dep aryzdandy Sanjar Boqaev.

Sanjar Boqaevtyń deregine sensek, kóshe jumystaryna bıýdjetten 490 mıllıon teńge bólingen. Biraq eski plıtka sapaly kúıinde alynǵandyqtan, eshqandaı qosymsha qun ákelmeı otyr. Onyń ornyna jańaǵa uqsas plıtka tóselgen. Qoǵan belsendisi bul jaǵdaıdy ákimdik pen merdigerdiń kelisimi arqyly júzege asqan zańsyz áreket retinde sıpattady.

«Ákimdik pen merdiger birigip urlyq jasaıdy, túsinesiz be? Olar jaqsy jerlerdi tańdap alyp, júzdegen mıllıonǵa jumys josparlap qoıady. «Mynany sheship alasyńdar, satyp jiberesińder, aqshany bólisemiz, biz qaıtadan jańasyn tóseımiz» deıdi. Ár eki jyl saıyn osylaı qaıtalanady. Sizder faktini tirkeńizder, tergeý toby sııaqty tekseris júrgizińizder, ary qaraı biz, bálkim, Antıkorǵa ótkizemiz. Munyń bárin Dýsaev áýelden josparlap qoıǵany túsinikti. Jańa ákim áli jaǵdaıǵa tolyq kirisip úlgermedi, júz kún de ótken joq. Al qyzmetter she? Jaýapty organdar – Ishki ister departamenti, ulttyq qaýipsizdik komıtetiniń departamenti, memlekettik kirister departamenti, máslıhat depýtattary mundaı zańsyzdyqtarǵa der kezinde nazar aýdarmaǵan», – dep Sanjar Boqaev synǵa aldy.

Qalada áli kúnge deıin 200-den astam kóshege asfalt tóselmegen. Al ortalyqta sapaly jabyndy qaıta-qaıta aýystyrý orynsyz shyǵyn retinde kórsetildi.

Bul máselege qatysty Almaty ákimdigi jaýap berdi.  Ákimdiktiń pikirinshe, Ýálıhanov kóshesinde (Shevchenkodan Qazybek bıge deıin) abattandyrý jumystary júrip jatyr. Eski tas tóseýish aýystyrylyp, jańa jaryqtandyrý, avtosýarý júıesi, shaǵyn arhıtektýralyq nysandar men qorshaýlar ornatylyp, kógaldandyrý júrgizilgen.

«Bul býlvardaǵy tas tóseýish sońǵy ret 2004 jyly aýystyrylǵan. 2014 jyly jóndeý jumystary júrgizildi, biraq tóseýish jańartylǵan joq. Tek qorshaýlar men sýarý júıesiniń bir bóligi ornatyldy. Osylaısha, qazirgi tóseýish 20 jyldan astam ýaqyt paıdalanylyp, tolyq aýystyrýdy qajet etti. 2024 jyly júrgizilip jatqan jóndeý barysynda burynǵy úlgidegi qyrly jáne oıyqty tas tóseýishtiń dál sondaı túrin tabý múmkin bolmady. Bul materıal óndiristen shyǵarylyp, tehnıkalyq turǵydan eskirgen. Sonymen qatar, birqatar jerde tóseýishtiń tozýy men aqaýlary anyqtaldy. Sol sebepti merdiger uıym ony tolyq aýystyryldy«, – dep jaýap berdi qala ákimdigi.

500 mıllıon teńge (qosymsha qun salyǵymen) tek Ýálıhanov býlvaryna ǵana emes, basqa nysandarǵa da jumsalǵan deıdi ákimdik.

«Sonyń ishinde Shevchenkodan Qazybek bıge deıingi aralyqtaǵy jumystarǵa – 296 mıllıon teńge, al Qarasaı batyr býlvarynda (Dostyq pen Nazarbaev kósheleriniń arasyndaǵy bólik) atqarylyp jatqan jumystarǵa – 204 mıllıon teńge bólindi. Tas tóseýishtiń Almaty oblysyna áketilýine qatysty túsinikteme beremiz. Kelisimshart boıynsha buzylǵan materıaldy kádege jaratý qarastyrylǵan. Osyǵan oraı merdiger uıymnyń ótinishi jáne tapsyrys berýshimen kelisim negizinde shamamen 90 sharshy metr tóseýish muqtaj otbasyna berildi. Qalǵan materıal merdiger uıymnyń qoımasynda saqtaýly«, – dedi Almaty ákimdigi.