قوعامدا ەكپەگە كۇمانمەن قارايتىندار كوپ

بيىلعى جىلى قىزىلشا اۋرۋى ءورشىپ, قىركۇيەك-جەلتوقسان ايلارى ارالىعىندا كەڭىنەن تارادى. سىرقاتتانعاندار سانى 19 مىڭعا جەتىپ, ەكى ءسابي قايتىس بولدى.
قازاقستاندا قىزىلشا اۋرۋىن جۇقتىرعاندار العاش ناۋرىز ايىندا تىركەلە باستادى. ەلىمىزدىڭ جەتى وڭىرىندە 20 جاعداي زەرتحانالىق راستالدى. سول كەزدە قىزىلشا قازاقستانعا ەگيپەتتەن, تۇركيادان جانە رەسەيدەن اكەلىنگەنى ايتىلدى.

الايدا, جەرگىلىكتى دەنساۋلىق ساقتاۋ مينيسترلىگى جەدەل ۆيرۋستىق اۋرۋدىڭ بۇكىل ەل بويىنشا تارالۋىن دەر كەزىندە توقتاتا المادى. شىلدەدە قىزىلشا اۋرۋىنىڭ ەكى مىڭ جاعدايى تىركەلگەنى تۋرالى حابارلاندى. قاراشا ايىنىڭ باسىندا – 13 مىڭ ناۋقاس تۋرالى بەلگىلى بولدى. ال 1 جەلتوقسانداعى بريفينگتە دەنساۋلىق ساقتاۋ مينيسترلىگىنىڭ باسشىسى اجار عينيات ايتقانداي, ولاردىڭ سانى 19 مىڭعا جۋىقتادى.

دارىگەر شولپان دايراباەۆانىڭ ايتۋىنشا, اۋرۋدىڭ بۇلايشا ورشۋىنە ءبىرىنشى كەزەكتە دەر كەزىندە ەكپە الماۋ سەبەپ بولعان. اسىرەcە, COVID-19 كەزىندە ءۇش جىل قاتارىنان ەكپە الۋ ءۇردىسى ۇزىلگەن, وعان قوسا ءتۇرلى جالعان اقپاراتتار دا جاپپاي ۆاكتسيناتسياعا كەدەرگى كەلتىرىپ جاتقان كورىنەدى.

«قىزىلشانىڭ نەگىزگى ءورشۋ سەبەپتەرى – كۇنتىزبە بويىنشا بەلگىلەنگەن ۋاقىتتا ەكپە الماۋ. وعان الەۋمەتتىك جەلىلەردە كەڭ تاراعان انتيۆاكتسينالىق جالعان اقپاراتتاردى تاراتۋشىلاردىڭ كوبەيۋى, اتا-انالاردىڭ جەكە ءدىني نانىم-سەنىمدەرى سەبەپكەر بولىپ وتىر. قىزىلشا, نەگىزىنەن, ەكپەگە يگەرىلەتىن جۇقپالى اۋرۋ, ياعني ۆاكتسينا العان بالا 96%-عا قورعالادى. سونىمەن قاتار ەكپە سالۋ مەرزىمىنىڭ وزگەرۋىنىڭ دە كەلەڭسىز جاعدايعا وزىندىك اسەرى بار. اتا-انالار اراسىندا تۇرعىلىقتى مەكەن-جاي بويىنشا ەمحاناعا ۋاقىتىلى بارماي, ەكپە سالۋ ۋاقىتىن جىبەرىپ العاندار كوپ», – دەپ ءتۇسىندىردى دارىگەر.

مامان ەپيداحۋالدىڭ ناشارلاۋىنىڭ تاعى ءبىر سەبەبى رەتىندە كوروناۆيرۋس ينفەكتسياسىنىڭ ءۇش جىلعا سوزىلعان پاندەمياسىن ايتۋعا بولادى دەيدى.

«سوڭعى ءۇش جىل ىشىندە كوروناۆيرۋس ىندەتى كەزىندەگى لوكداۋن سالدارىنان اتا-انالار جوسپارلى تۇردە ەمحاناعا كەلە المادى, ياعني قانشاما بالا ەكپەسىز قالدى دەگەن ءسوز. وعان قوسا پاندەميا – جالعان اقپارات ىندەتىنە اينالدى, ونىڭ زالالىن ءالى كۇنگە دەيىن شەگىپ كەلەمىز. انتيۆاكسەرلەر ۇگىت-ناسيحات جۇمىستارىن جالعاستىرىپ كەلەدى, سوندىقتان قوعامدا ەكپەگە كۇمانمەن قارايتىندار كوپ», – دەدى شولپان دايراباەۆا.

ال اۋرۋعا شالدىققان ءبىر بالانىڭ ءوزى قاسىنداعا 8-10 بالاعا قىزىلشا جۇقتىرا الادى, دەپ ەسكە سالادى دارىگەر. جۇقپالى اۋرۋدىڭ ءدال قىركۇيەك-جەلتوقسان ايلارىندا ءورشۋى دە سونىڭ دالەلى. بالاباقشا, مەكتەپ ەسىگى اشىلعان ۋاقىتتا ەكپە الماعان نە يممۋندىق جۇيەسى ءالسىز بالا, ارينە, بىردەن اۋرۋعا شالدىعادى. دەگەنمەن, ماماننىڭ ايتۋىنشا, كەيىنگى كەزدەرى ەپيدەميالىق جاعداي ءبىرشاما جاقساردى.

«كەيىنگى كەزدەرى ەپيدەميالىق جاعداي وڭالىپ كەلەدى, ونىڭ بىردەن-ءبىر سەبەبى 1 قاراشادان باستاپ قوسىمشا جاپپاي ۆاكتسيناتسيا جۇرگىزىلە باستادى. قىزىلشا اۋرۋى تەك ەكپە الماعان, ۋاقىتىلى دارىگەرگە كورىنبەگەن بالالار اراسىندا عانا تىركەلىپ جاتىر», – دەدى مامان.

ءسوز سوڭىندا دارىگەر مامان ءاربىر ەكپە مەديتسينالىق ساراپتامادان ءوتىپ, ءوزىنىڭ تيىمدىلىگىن دالەلدەيتىنىن ەسكە سالىپ, بالالاردىڭ دەنساۋلىعىنا كەرى اسەر ەتپەيتىنىن ايتىپ ءوتتى. ءاربىر ەكپەنىڭ الدىندا مىندەتتى تۇردە دارىگەردىڭ تولىق تەكسەرۋىنەن ءوتۋ كەرەكتىگىن دە ەسكە سالدى. ەكپە تۇرعىلىقتى مەكەن-جاي بويىنشا كەز-كەلگەن ەمحانادا تەگىن جاسالادى.

قازاقستاندا ەپيداحۋال وڭالىپ جاتقانىنان قاراماستان, وڭىرلەر بويىنشا جاعداي ءالى دە كۇردەلى ەكەنىن ەسكە سالامىز. سقو-دا قىزىلشامەن اۋىرعاندار سانى كۇرت ءوستى,
ءبىر جارىم اي ىشىندە وڭىردە 171 جاعداي انىقتالدى. قىزىلشا اۋرۋى باتىس قازاقستان وبلىسىنىڭ بارلىق اۋداندارىندا انىقتالدى. وسىدان بىرەر كۇن بۇرىن بقو باس سانيتارلىق دارىگەرى مۇحامعالي ارىسپاەۆ قىزىلشا بويىنشا ەپيدەميولوگيالىق جاعدايدى قولايسىز دەپ باعالادى. 12 اقپاندا قىزىلشا دياگنوزىمەن 255 جاعداي تىركەلدى.