جاڭالىقتار
كوكشەتاۋ قالاسىنا 1 ميلليارد تەڭگەدەن استام قارجى ءبولدى
فوتو: اشىق دەرەككوز
مەملەكەت باسشىسى قاسىم-جومارت توقاەۆتىڭ ينجەنەرلىك جەلىلەر مەن جىلۋ كوزدەرىنىڭ توزۋىن ازايتۋ جونىندەگى تاپسىرمالارىن جۇزەگە اسىرۋ شەڭبەرىندە اقمولا وبلىسى كوكشەتاۋ قالاسىنداعى جىلۋ كوزىندە جوندەۋ جۇمىستارىن جۇرگىزۋ ءۇشىن ۇكىمەت رەزەرۆىنەن شامامەن 1,1 ملرد تەڭگە ءبولىندى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ حابارلايدى qandastar.kz
قۇجاتقا سايكەس, 2025-2026 جىلدارعا ارنالعان جىلۋ بەرۋ ماۋسىمىنا دايىندىق جانە كەزەڭنىڭ ىركىلىسسىز ءوتۋىن قامتاماسىز ەتۋ ماقساتىندا كوكشەتاۋ قالاسىنىڭ جىلۋ كوزىندە (اق-2) جوندەۋ جۇمىستارىن جۇرگىزۋ ءۇشىن اقمولا وبلىسىنىڭ بيۋدجەتىنە قاراجات اۋدارىلادى.
بولىنگەن قاراجات «كوكشەتاۋ جىلۋ» كاسىپورنىنىڭ تەحنولوگيالىق پروتسەستەردى باسقارۋدىڭ اۆتوماتتاندىرىلعان جۇيەسىن جانە باقىلاۋ-ولشەۋ اسپاپتارىنىڭ دالالىق دەڭگەيىن جانە سۋ جىلىتاتىن توزاڭ كومىر قازاندىعىنىڭ اۆتوماتيكاسىن, سونداي-اق قازاندىق اگرەگاتىنىڭ قىزدىرۋ بەتتەرىن رەكونسترۋكتسيالاۋ, قازاندىق اگرەگاتىنىڭ اۋا جىلىتقىشتارىنىڭ تەكشەلەرىن جوندەۋ, تەحنولوگيالىق رەسۋرسى تاۋسىلعان جابدىقتاردىڭ بىرلىكتەرىن جوندەۋ جانە اۋىستىرۋ جونىندەگى جوبالاردى جۇزەگە اسىرۋعا باعىتتالادى.
ەسكە سالا كەتەيىك, كوكشەتاۋ قالاسىنىڭ نىساندارىن جىلۋمەن جابدىقتاۋ №1 اۋداندىق قازاندىق (مازۋت) جانە №2 اۋداندىق قازاندىقتارى (كومىر) ارقىلى جۇزەگە اسىرىلادى. الايدا جىلۋمەن قامتاماسىز ەتۋدىڭ نەگىزگى كوزى توزاڭ كومىرمەن جۇمىس ىستەيتىن №2 اۋداندىق قازاندىعى بولىپ قالا بەرەدى. جىلۋ جەلىلەرىنىڭ جالپى ۇزىندىعى 188,7 شاقىرىم ( 51 شاقىرىم – ماگيسترالدى, 137,7 شاقىرىم – ورامىشىلىك). جەلىلەردىڭ نەگىزگى بولىگى 1977 جىلدان بەرى جۇمىس ىستەپ تۇر.
2024 جىلى ۇكىمەت رەزەرۆىنەن بولىنگەن قاراجات ەسەبىنەن ۇزىندىعى 6 شاقىرىم ماگيسترالدى جەلى جوندەلدى, سونداي-اق № 2 جانە № 3 قازاندىق اگرەگاتتارىنا جوندەۋ جۇرگىزىلدى. ناتيجەسىندە, اعىمداعى جىلىتۋ كەزەڭىندە توزۋ كورسەتكىشى 45%-دان 43%-عا دەيىن تومەندەدى, جىلۋ جەلىلەرىندەگى تەحنولوگيالىق بۇزىلۋلار سانى 62-دەن 47-گە دەيىن ازايدى.
