جاڭالىقتار
كولىك جۇرگىزۋشىسى TikTok-تاعى ۆيدەوسى ءۇشىن قاماۋعا الىندى
فوتو: اشىق دەرەككوز
استانادا Lexus كولىگىنىڭ جۇرگىزۋشىسى TikTok جەلىسىندەگى ۆيدەوسى ءۇشىن قاماۋعا الىنىپ, جۇرگىزۋشى كۋالىگىنەن ايىرىلدى.
بۇل تۋرالى استانا قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى مالىمدەدى, دەپ حابارلادى qandastar.kz پورتالى Stan.kz اقپارات اگەنتتىگىنە سىلتەمە جاساپ.
الەۋمەتتىك جەلىدە Lexus اۆتوكولىگىنىڭ جۇرگىزۋشىسى كولىگىنە جالعان مەملەكەتتىك نومىرلەر تاعىپ, جول ەرەجەسىن بۇزىپ جاتقانى تۇسىرىلگەن ۆيدەو تارادى.
سوت وتىرىسىندا قۇقىق بۇزۋشى ءوز كىناسىن مويىنداپ, ارەكەتى ءۇشىن وكىنەتىنىن ايتتى. ول بۇل ۆيدەونى TikTok جەلىسىندە جاريالاۋ ءۇشىن تۇسىرگەنىن ايتتى.
«سوت قاۋلىسىمەن ب قۇقىق بۇزۋشىلىق جاساعانى ءۇشىن كىنالى دەپ تانىلىپ, ءبىر جىل مەرزىمگە كولىك قۇرالىن باسقارۋ قۇقىعىنان ايىرا وتىرىپ, بەس تاۋلىككە قاماۋعا الۋ جازاسى تاعايىندالدى», – دەلىنگەن سوت حابارلاسىندا.
