كولىكتى تىركەۋ: كونستيتۋتسيالىق سوت شەتەلدە تۇراتىن قازاقستاندىقتاردىڭ قۇقىعىن قورعادى

فوتو: اشىۇ دەرەككوز

كونستيتۋتسيالىق سوت شەتەلدە تۇراتىن قازاقستاندىقتاردىڭ قۇقىعىن قورعادى, دەپ جازادى qandastar.kz

قازاقستان رەسپۋبليكاسىنىڭ كونستيتۋتسيالىق سوتى ازاماتتىڭ ءوتىنىشى بويىنشا جول ءجۇرىسى تۋرالى (65-باپتىڭ 1-تارماعى) جانە كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ تۋرالى (10-باپتىڭ 5-2 تارماعى) زاڭدارىنىڭ نورمالارىنىڭ كونستيتۋتسياعا سايكەستىگىن تەكسەرىپ, قورىتىندى شەشىمىن شىعاردى.

بۇعان دەيىن شەتەلدە تۇراقتى تۇراتىن قازاقستان رەسپۋبليكاسىنىڭ ازاماتىنىڭ باسقا مەملەكەتتە تىركەلگەن كولىگىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋدان باس تارتقان. ونىڭ ءوزىنىڭ كولىگىمەن قازاقستانعا كىرۋدەگى ماقساتى سپورتتىق جارىستارعا قاتىسۋ جانە تۋىستارىنا بارۋ ءۇشىن ۋاقىتشا سيپاتتا بولعانىنا قاراماستان, اتالعان نورمالاردىڭ نەگىزىندە ونىڭ وزىنە مەنشىك قۇقىعىمەن تيەسىلى ءاۆتوموبيلىنىڭ حالىقارالىق قوزعالىستاعى اۆتوموبيل رەتىندە تانىلماۋى باس تارتۋعا نەگىز بولعان.

كونستيتۋتسيالىق سوت مىنالاردى كورسەتتى. قازاقستان رەسپۋبليكاسىنىڭ قولدانىستاعى قۇقىعىنا جاتاتىن قازاقستان راتيفيكاتسيالاعان جول ءجۇرىسى تۋرالى كونۆەنتسياعا سايكەس (جول قوزعالىسى تۋرالى زاڭدا وسى كونۆەنتسيانى قولدانۋدا الىپ تاستاۋ جوق), كولىك قۇرالى رەتىندە مەملەكەتتەن تىس تۇراقتى تۇراتىن جانە ونى وسى مەملەكەتكە ۋاقىتشا اكەلگەن جەكە تۇلعاعا تيەسىلى بولۋىنا بايلانىستى حالىقارالىق جول جۇرىسىندەگى كولىك بولىپ ەسەپتەلەدى جانە ونىڭ ازاماتتىققا قاتىسى جوق. جەكە تۇلعانىڭ نەگىزگى ومىرلىك مۇددەلەرى نازارعا الىنعان مەملەكەتتە تۇرعىلىقتى جەرى (ادەتتەگى, تۇراقتى) فاكتىسى باسىمدىققا يە بولۋى كەرەك.

كونستيتۋتسيالىق سوت مىنانداي تۇجىرىمدارعا كەلدى.

جول ءجۇرىسى تۋرالى (65-باپتىڭ 1-تارماعى) جانە كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ تۋرالى (10-باپتىڭ 5-2-تارماعى) زاڭداردىڭ قارالعان نورمالارى قازاقستان رەسپۋبليكاسىندا تۇرۋعا ىقتيارحاتى جوق شەتەلدىككە نەمەسە ازاماتتىعى جوق ادامعا جانە ولار ءبىزدىڭ مەملەكەتىمىزدىڭ اۋماعىندا پايدالاناتىن ۋاقىتشا اكەلىنگەن كولىگىنە قاتىستىلىعى تۇرعىسىندا قازاقستان رەسپۋبليكاسىنىڭ كونستيتۋتسياسىنا سايكەس كەلەدى. اتالعان كولىكتىڭ ازاماتتىق-قۇقىقتىق جاۋاپكەرشىلىگىن ساقتاندىرۋ بويىنشا مىندەتتەمە ساقتاندىرۋ تۋرالى زاڭنىڭ جانە جول ءجۇرىسى تۋرالى كونۆەنتسيانىڭ باسقا نورمالارىنا سايكەس ساقتالادى.
الايدا, قازاقستان رەسپۋبليكاسىنىڭ اۋماعىنا ۋاقىتشا اكەلىنگەن ءبىزدىڭ ەلىمىزدە تىركەلمەگەن كولىك مەملەكەتتەن تىس جەردە تۇرعىلىقتى جەرى بار قازاقستاندىققا تيەسىلى جانە ول كولىكتى قازاقستان اۋماعىندا جەكە ءوزى پايدالاناتىنى تۇرعىسىندا زاڭ نورمالارى كونستيتۋتسياعا سايكەس كەلمەيدى.

قابىلدانعان شەشىمگە سايكەس زاڭنامانى جەتىلدىرۋ بويىنشا ۇكىمەتكە ءتيىستى ۇسىنىمدار بەرىلدى.