كونستيتۋتسيالىق سوت سالىق كودەكسىنەن زاڭدى بۇزاتىن نورمانى انىقتادى

فوتو: freepik

كونستيتۋتسيالىق سوت ازاماتتاردىڭ سالىق كودەكسىنىڭ 616 – بابى 1-بولىگىنىڭ 13-تارماقشاسىنىڭ كونستيتۋتسياعا سايكەستىگىن تەكسەرۋ تۋرالى وتىنىشتەرىن قارادى, دەپ حابارلايدى Zakon.kz.

بۇل نورماعا سايكەس مۇگەدەكتىگى بار ادامدار, سونداي-اق بالا جاسىنان مۇگەدەكتىگى بار, مۇگەدەكتىگى بار بالانىڭ اتا-اناسىنىڭ ءبىرى تالاپكەر رەتىندە سوتتا مەملەكەتتىك باج تولەۋدەن بوساتىلادى.

وتىنىشكە تۇرتكى نە?

ازاماتتىق ءىس جۇرگىزۋ بارىسىندا جاۋاپكەر بولعان ءوتىنىش سۋبەكتىلەرىنىڭ پىكىرىنشە, سالىق كودەكسىنىڭ بۇل نورماسى سوت اكتىلەرىنە كاسساتسيالىق تارتىپپەن شاعىم جاساۋ كەزىندە ولاردىڭ سوت تورەلىگىنە قول جەتكىزۋگە كونستيتۋتسيالىق قۇقىعىنا نۇقسان كەلتىرەدى, اتاپ ايتقاندا, سوت شەشىمىنە كاسساتسيالىق ساتىعا شاعىمدانعان كەزدە مەملەكەتتىك باج تولەۋدەن زاڭمەن بوساتىلعان وسىعان ۇقساس جاعدايداعى الەۋمەتتىك وسال ادامدار ساناتىنداعى تالاپكەرلەرمەن تەڭ ەمەس ءىس جۇرگىزۋ جاعدايىنا قويادى.

كونستيتۋتسيالىق سوت بۇعان دەيىن ءوزىنىڭ قورىتىندى شەشىمدەرىندە بارلىعىنىڭ زاڭ مەن سوت الدىنداعى تەڭدىگى مەملەكەتتىڭ ادام قۇقىقتارىن تەڭ قورعاۋىن جانە ارقايسىسىنىڭ زاڭ الدىنداعى تەڭ جاۋاپكەرشىلىگىن, مىندەتتەرىن ورىنداۋعا قويىلاتىن تالاپتاردىڭ بىرىڭعاي بولۋىن بىلدىرەتىنىن اتاپ كورسەتكەن.

• زاڭدارمەن ادامداردىڭ قۇقىقتارىندا وبەكتيۆتى جانە اقىلعا قونىمدى نەگىزدەمەسى جوق ايىرماشىلىقتار بەلگىلەنبەۋى ءتيىس.
• تەڭ دارەجەدەگى قۇقىق سۋبەكتىلەرى تەڭ قۇقىقتىق جاعدايدا بولۋى ءتيىس.
• وسى كونستيتۋتسيالىق قاعيداتتى ىسكە اسىرۋ قورعاۋ تاسىلدەرىندە جانە ماتەريالدىق جانە پروتسەستىك نورمالاردىڭ بىرتۇتاستىعى نەگىزىندە بۇزىلعان قۇقىقتارى مەن بوستاندىعىن قالپىنا كەلتىرۋدە تەڭ بولۋدى الدىن الا ايقىندايدى.

كونستيتۋتسيالىق سوت ءوتىنىشى قارالىپ وتىرعان ادامدار ءۇشىن ولاردىڭ الەۋمەتتىك مارتەبەسىن ەسكەرە وتىرىپ, كاسساتسيالىق شاعىمدانۋ ساتىسىندا بىرىڭعاي زاڭنامالىق ءتاسىلدى قولدانۋ قاجەتتىگىن اتاپ ءوتتى.