«كوپتەن كۇتكەن بالاسىن ءولتىردى»: گوركي پاركىندە ءوز-وزىنە قول جۇمساعان ايەل تۋرالى تىڭ دەرەك شىقتى

الماتى وبلىسى ىلە اۋدانى ارمان اۋىلىنىڭ يۋليا اتتى تۇرعىنى 24 ماۋسىمدا قالاداعى دەمالىس ساياباعىندا وزىنە قول جۇمسادى. ول شولۋ دوڭگەلەگىنەن سەكىرىپ, سول جەردە مەرت بولدى. كەيىنىرەك, ول ۇيىندە 5 جاسار قىزىن تۇنشىقتىرىپ ءولدىردى دەگەن اقپارات شىقتى,-دەپ حابارلايدى Qandastar.kz

ساياباققا بارعانعا دەيىن ول 2018 جىلى تۋعان قىزى ۆارۆارانى ۇيىندە تۇنشىقتىرىپ ولتىرگەن.

كورشىلەرى يۋليانىڭ تۇرمىستىق جاعدايىنىڭ جاقسى بولعانىن, ەشقانداي ۇرىس-كەرىس ەستىمەگەندەرىن ايتادى. يۋليانىڭ كۇيەۋى ءىت مامانى بولىپ جۇمىس ىستەيدى. ولاردىڭ وتباسىلىق جاعدايى جاقسى بولعان, جاقىندا عانا كولىك ساتىپ العان. جىلىنى ءبىر رەت شەتەلگە دەمالۋعا باراتىن.

ولار بۇل اۋىلدا 10 جىلداي تۇرعان. الماتىدا دا پاتەرلەرى بار.

وتباسى سابيلەرىن ۇزاق كۇتكەن. كورشىلەرى اتا-اناسىنىڭ قىزىنا بارلىق جاعدايىن جاساپ, اۋلا ىشىنە باسسەين مەن توبەشىك ورناتقانىن ايتتى. بۇل وتباسىنىڭ تاعدىرى وسىلاي بولاتىنىن ەشكىم ويلاماعان دا.

كورشىلەرى يۋليانىڭ قىزىن ۇنەمى جەتەكتەپ جۇرەتىنىن, كەيدە جازدىڭ ىستىعىندا قالىڭ كيىم كيەتىنىن بايقاعان, بىراق پسيحيكالىق اۋىتقۋى تۋرالى ەشتەڭە ەستىمەگەن.

«ءوزى دە, كۇيەۋى دە قىزدارىن ۇنەمى جەتەكتەپ جۇرەتىن. مارقۇم ايەل ىستىق كەزدە قالىڭ كيىممەن جۇرەتىن. اياعىنا قالىڭ قىستىق ەتىك كيىپ الىپ جۇرگەنىن بارلىق كورشىلەر بىرنەشە رەت كورىپتى. قىزىن دا قالىڭ كيىندىرىپ قوياتىن. بىراق پسيحيكالىق اۋرۋى تۋرالى ەستىگەن جوقپىز. سىرت كوزگە تىم جاقسى وتباسى», – دەدى ساربينوز ەسىمدى كورشىسى.

يۋليا اپكەسى يانا افونيناعا بارىپ, قىزىن ولتىرگەنىن ايتقان سوڭ, قاشىپ كەتكەن. يانا ءدال سول ماكسيم گوركي اتىنداعى ساياباقتىڭ ماڭىندا تۇراتىن. پوليتسياعا دا بۇل تۋرالى يانا حابارلادى. بۇل تۋرالى كورشىلەرى دە بىلمەگەن.

قىزىن ءولتىرىپ, ارتىنان ءوز-وزىنە قول جۇمساعانى تۋرالى اۋىل تۇرعىندارى تەك پوليتسيا كەلىپ, كۋا رەتىندە سوزگە تارتىلعان كەزدە ءبىلدى.

«ءبىز پوليتسيا كەلگەن كەزدە ۇيگە كىردىك. اكەسى وزىنە قول جۇمساپ قويماسىن, قاراپ قويىڭىزدار دەگەن سوڭ كىردىك. اكەسى ءۇن-ءتۇنسىز ديۆاندا جاتىر ەكەن. ول جۇمىستان كەلىپتى. كىشكەنتاي ۆارۆارامەن ۇلكەن نەمەرەم ۇنەمى وينايتىن. بىراق ەشبىر كەمشىلىك بايقاعان ەمەسپىز», – دەدى تاعى ءبىر كورشىسى ولگا.

پوليتسيا وقيعاعا قاتىستى تەرگەۋ جۇرگىزىپ جاتىر, بىراق باسقا اقپارات جاريالانعان جوق.