جاڭالىقتار
كورەيالىقتار تاڭداۋ جاسادى
![](https://qandastar.kz/wp-content/uploads/2024/04/IMG_5222.jpeg)
وڭتۇستىك كورەيادا پارلامەنتتىك سايلاۋ ءوتتى. وسى سايلاۋدى باقىلاۋعا ءبىزدىڭ ەلدەن قازاقستان ورتالىق سايلاۋ كوميسسياسىنىڭ توراعاسى نۇرلان ءابدىروۆ باستاعان دەلەگاتسيا باردى. سايلاۋ قورتىندىسى بىرەر ساعاتتا جاريالانادى.
نۇرلان ءابدىروۆ الدىمەن وڭتۇستىككورەيالىق ارىپتەسىمەن كەزدەستى. تاراپتار ەكى ەلدىڭ سايلاۋ كوميسسيالارى اراسىنداعى ىنتىماقتاستىقتى تەرەڭدەتۋ تۋرالى كەلىسىمگە كەلدى. سونداي-اق سايلاۋ پروتسەسىندە جاساندى ينتەللەكتىنى پايدالانۋعا ارنالعان فورۋمعا قاتىستى. ورتالىق سايلاۋ كوميسسياسىنىڭ توراعاسى ەلدە جۇرگىزىلىپ جاتقان رەفورمالار جايلى ايتتى.
نۇرلان ءابدىروۆ, قر وسك توراعاسى: – جاساندى ينتەللەكتىن پايدالانۋدىڭ ءتيىمدى جاعى بار, ۇتىمدى جاعى بار سونىمەن قاتار بۇنىڭ قاۋىپتەرى دە كوپ جانە ول قانداي قاۋىپتەر ەكەنى ناقتى بۇگىن وسى جەردە ايتىلدى. حالىقارالىق بايقاۋشىلارعا سايلاۋ تۋرالى زاڭنىڭ نەگىزگى ەرەجەلەرى ويىن تۇرىندە تانىستىرىلدى.
وتكەن جۇمادا ءتۇرلى سەبەپتەرمەن داۋىس بەرۋگە قاتىسا الماعان ادامدار الدىن الا تاڭداۋ جاسادى. ول جالپى ەلەكتوراتتىڭ 30 پايىزىنا تەڭ. قوناقتارعا مەرزىمىنەن بۇرىن داۋىس بەرۋ جۇيەسى كورسەتىلدى. نۇرلان ءابدىروۆ, قر وسك توراعاسى: – سايلاۋشىلارعا ىڭعايلى ۋاقىتتا داۋىس بەرەتىندەي مۇمكىندىك جاساپ وتىر. بۇگىن, مىسالى, سەنبى كۇنى مەملەكەتتىڭ شەشىمىمەن ارنايى دەمالىس كۇنى جاريالانعان ەكەن, سوندىقتان بۇگىن ەشكىم جۇمىس ىستەمەيدى وسى سايلاۋعا كەلەدى. وڭتۇستىك كورەياداعى پارلامەنتتىك سايلاۋدا 2 باستى باسەكەلەس بار.
ولار قازىرگى بيلىك پارتياسى «حالىق بيلىگى» جانە وپپوزيتسيالىق «بىرگە» دەموكراتيالىق پارتياسى. ۇلتتىق جينالىستا بارلىعى 300 ورىن بار. ونىڭ 142-ءسى وپپوزيتسياعا, 113-ءى بيلىك پارتياسىنا تيەسىلى. قارسىلاستار پارلامەنتتەگى ورىندارىن كوبەيتۋدى كوزدەپ وتىر. پاك نا چجون, سايلاۋشى: – مەنىڭ ويىمشا, پرەزيدەنت يۋن سوك يول اكىمشىلىگىنىڭ وپپوزيتسياعا قاراعاندا ءالسىز بولۋى دۇرىس ەمەس. ونى بارلىق ازامات تاڭدادى. مەنىڭشە, ونىڭ ۇكىمەتى تابىسقا جەتۋى كەرەك. سول ءۇشىن بيلىك پارتياسىنا داۋىس بەردىم. كيم دجي يۋن, سايلاۋشى: – مەنىڭ ويىمشا, قازىرگى بيلىكتىڭ العان باعىتى دۇرىس ەمەس. ساياساتتا مىقتى ادامدار بولۋى كەرەك. وزگەرىس ءۇشىن تاڭداۋ جاسادىم. سايلاۋ ۋچاسكەلەرىندە سۋرەتكە, ۆيدەوعا تۇسىرۋگە بولمايدى.
بيۋللەتەندى تاسپاعا باسقاندار 3 مىڭ دوللار كولەمىندە ايىپپۇل تولەيدى نەمەسە 2 جىلعا دەيىن باس بوستاندىعىنان ايىرىلۋ مۇمكىن. حالىقارالىق باقىلاۋشىلار دا سايلاۋ ۋچاسكەلەرىندە كۇزەتشىلەردىڭ جوقتىعىنا جانە داۋىس بەرۋ كەزىندە عيماراتتاعى باقىلاۋ كامەرالارىنىڭ ءوشىپ تۇرعانىنا تاڭ قالدى. بۇل سايلاۋشى تاڭداۋىن قۇپيا ساقتاۋ ءۇشىن جاسالىپ وتىر.