«قورلانىپ كەتىپ بارامىن»: جەتىسۋدا وبلىستىق انتيكور قىزمەتى بەلگىلى جازۋشىنى قوعامدىق كەزدەسۋگە الداپ شاقىرعان

فوتو: kitap.kz

جەتىسۋ وبلىسىنىڭ سىبايلاس جەمقورلىققا قارسى قىزمەتى مەن «جەتىسۋ جاستارى ۇيىمىنىڭ كونگرەسى» بەلگىلى جازۋشى, جۋرناليست قانات تىلەۋحاندى قوعامدىق كەزدەسۋگە الداپ شاقىردى. بۇل تۋرالى جازۋشىنىڭ ءوزى الەۋمەتتىك جەلىدەگى پاراقشاسىندا جازدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

«وتكەن بەيسەنبىدە تالدىقورعاننان ءبىر جىگىت حابارلاستى. «اعا, ەرتەڭ كەلە الاسىز با?» دەدى ەنتىگىپ. «تىنىشتىق پا?» دەيمىن. «سىزبەن كەزدەسۋ ۇيىمداستىرساق» دەدى. ب.ريموۆا تەاترىندا «مەدال» سپەكتاكلى قويىلعاندا عانا تۋعان جەردە ءبىر شىعارماشىلىق قاۋىشۋ بولعان ەدى. وسى ۋاقىتقا دەيىن تالدىقورعاندا وقىرمانمەن بەس مينۋتتىق تا كەزدەسۋ وتكىزبەپپىن. «جاقسى» دەپ كەلىستىم. بۇگىن كەلسەم, «سىبايلاس جەمقورلىققا قارسى ەركىن فورماتتاعى» كەزدەسۋ دەپ تۇر. ەكى جاس قىز ءجۇر ەكەن. «مەنىڭ جەمقورلىققا قاتىسىم نە?» دەسەم, كۇمىلجىپ, دۇرىس جاۋاپ بەرە المادى. اقىرى كەلدىم عوي دەپ وتىردىم. سونىمەن ءبىر ساعات ءوتتى, ەشكىم جوق. «قىزدار, بۇنىڭ ءبارى وتچەت ءۇشىن عوي. ۆيدەوعا ءتۇسىرىپ الىڭدار. كەشىگىپ كەلە جاتقان كورەرمەندى ءتۇسىرىپ, مونتاج جاساي سالارسىڭدار» دەسەم, «ماقۇل» دەيدى. نەگىزى ازىلدەپ ايتقام. «جاقسى, جاقسى» دەپ, موبيلوگرافقا ءتۇسىرتىپ جاتىر. «بالالار, مىنالارىڭ ۇيات قوي. امان بولىڭدار» دەسەم, «رەنجىمەڭىزشى» دەيدى. ءتىپتى «ەرتەڭ كەلە الاسىز با?» دەپ قويادى. الماتىدان جۇمىسىمدى تاستاپ كەلگەن ەم. اڭگىمە – وسى. ۇيىمداستىرۋشى – قوعامدىق دامۋ باسقارماسى مەن وبلىستىق انتيكور», – دەپ جازدى قانات تىلەۋحان.

ۇيىمداستىرۋشىلار كەيىننەن جازۋشىنىڭ ەسەپشوتىنا قالاماقى جىبەرىپ, ءوز كىنالارىن جۋىپ-شايماق بولعان.

«جىل باسىندا «شاتىرداعى ايەل» كىتابىمنىڭ تۇساۋكەسەرىن وتكىزىپ بەرەيىك دەگەن شاقىرتۋدى باسپاگەرىم اسىلان تىلەگەن ارقىلى العانمىن. ول كەزدە دە «وتچەت» ءۇشىن بولىپ قالدى. تالدىقورعانداعى جۇماتاي وسپان ۇلى باستاعان قالامگەرلەر: «قاقا, مىناۋ بىلاي بولادى دەپ ويلامادىق. كەيىن ءوزىمىز دۇرىستاپ ۇيىمداستىرايىقشى» دەگەن ەدى. ايتپاقشى, قايتىپ بارا جاتسام, شوتىما ەلۋ مىڭ تەڭگە ءتۇستى. دانا ەسىمدى قىز قوڭىراۋ شالىپ, كەشىرىم سۇرادى. 50 مىڭ تەڭگە قالاماقىم ەكەن. قايتا وزىنە سالىپ جىبەردىم. قورلانىپ كەتىپ بارام», – دەدى جازۋشى.

جەتىسۋ وبلىسىنىڭ جاستار ۇيىمى جازۋشىنىڭ جازباسىنا قاتىستى رەسمي تۇسىنىكتەمە بەرىپ, جازۋشىمەن كۇن ءتارتىبى كەلىسىلمەگەنىن اتاپ ءوتتى.

«2024 جىلعى 29 مامىردا مەملەكەتتىك ساتىپ الۋ پورتالى ارقىلى جەتىسۋ وبلىسىنىڭ قوعامدىق دامۋ باسقارماسى مەن جاستار كونگرەسى اراسىندا «قوعامدا سىبايلاس جەمقورلىققا قارسى مادەنيەت پەن پاراساتتىلىقتى نىعايتۋعا باعىتتالعان» جوبانى ۇيىمداستىرۋ بويىنشا قىزمەتتەردى مەملەكەتتىك ساتىپ الۋ تۋرالى شارت جاسالدى. تەحنيكالىق ەرەكشەلىككە سايكەس, ءبىز جىل سوڭىنا دەيىن كەمىندە 21 ءىس-شارا وتكىزۋدى جوسپارلاپ وتىرمىز. 17-قازاندا تەحنيكالىق ەرەكشەلىككە سايكەس باسقارمامەن TEDx فورماتىنداعى ءىس-شارانى وتكىزۋ جانە ونىڭ شەڭبەرىندە سپيكەر رەتىندە قانات تىلەۋحاندى شاقىرۋ كەلىسىلدى. الايدا الدىن الا كەلىسسوزدەر بارىسىندا ءبىز سپيكەرگە شارانىڭ كۇن تارتىبىنە سايكەس «سىبايلاس جەمقورلىقسىز بولاشاق» تاقىرىبىنا ارنالعانىن تولىق حابارلامادىق جانە تالقىلامادىق. سونىمەن قاتار 2024 جىلعى 21 قازاندا ءىس-شارانى وتكىزۋ كۇنى قاتىسۋشىلار سانى (كەمىندە 100 ادام) تولىق قامتاماسىز ەتىلمەدى, ناتيجەسىندە, كۇتپەگەن جاعدايلار ورىن الىپ, سپيكەر ءىس-شارانى وتكىزۋ ورنىنان كەتتى. وسىعان بايلانىستى, ءبىز بۇل ءىس-شارانىڭ شىعىندارىن ءوز ەسەبىمىزگە الامىز. سونىمەن قاتار ءىس-شارا ەسەپكە ەنگىزىلمەيدى جانە قايتا وتكىزىلەدى», – دەلىنگەن حابارلامادا.

سونداي-اق اتالعان وقيعاعا قاتىستى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتىنە حابارلاستىق, جاۋاپتار قوسىمشا جاريالاناتىنىن مالىمدەدى.