«Qorlanyp ketip baramyn»: Jetisýda oblystyq Antıkor qyzmeti belgili jazýshyny qoǵamdyq kezdesýge aldap shaqyrǵan

Foto: kitap.kz

Jetisý oblysynyń Sybaılas jemqorlyqqa qarsy qyzmeti men «Jetisý jastary uıymynyń Kongresi» belgili jazýshy, jýrnalıst Qanat Tileýhandy qoǵamdyq kezdesýge aldap shaqyrdy. Bul týraly jazýshynyń ózi áleýmettik jelidegi paraqshasynda jazdy, dep habarlaıdy qandastar.kz Skifnews.kz aqparat portalyna silteme jasap.

«О́tken beısenbide Taldyqorǵannan bir jigit habarlasty. «Aǵa, erteń kele alasyz ba?» dedi entigip. «Tynyshtyq pa?» deımin. «Sizben kezdesý uıymdastyrsaq» dedi. B.Rımova teatrynda «Medal» spektakli qoıylǵanda ǵana týǵan jerde bir shyǵarmashylyq qaýyshý bolǵan edi. Osy ýaqytqa deıin Taldyqorǵanda oqyrmanmen bes mınýttyq ta kezdesý ótkizbeppin. «Jaqsy» dep kelistim. Búgin kelsem, «Sybaılas jemqorlyqqa qarsy erkin formattaǵy» kezdesý dep tur. Eki jas qyz júr eken. «Meniń jemqorlyqqa qatysym ne?» desem, kúmiljip, durys jaýap bere almady. Aqyry keldim ǵoı dep otyrdym. Sonymen bir saǵat ótti, eshkim joq. «Qyzdar, bunyń bári otchet úshin ǵoı. Vıdeoǵa túsirip alyńdar. Keshigip kele jatqan kórermendi túsirip, montaj jasaı salarsyńdar» desem, «maqul» deıdi. Negizi ázildep aıtqam. «Jaqsy, jaqsy» dep, mobılografqa túsirtip jatyr. «Balalar, mynalaryń uıat qoı. Aman bolyńdar» desem, «renjimeńizshi» deıdi. Tipti «erteń kele alasyz ba?» dep qoıady. Almatydan jumysymdy tastap kelgen em. Áńgime – osy. Uıymdastyrýshy – Qoǵamdyq damý basqarmasy men oblystyq antıkor», – dep jazdy Qanat Tileýhan.

Uıymdastyrýshylar keıinnen jazýshynyń esepshotyna qalamaqy jiberip, óz kinálaryn jýyp-shaımaq bolǵan.

«Jyl basynda «Shatyrdaǵy áıel» kitabymnyń tusaýkeserin ótkizip bereıik degen shaqyrtýdy baspagerim Asylan Tilegen arqyly alǵanmyn. Ol kezde de «otchet» úshin bolyp qaldy. Taldyqorǵandaǵy Jumataı Ospanuly bastaǵan qalamgerler: «Qaqa, mynaý bylaı bolady dep oılamadyq. Keıin ózimiz durystap uıymdastyraıyqshy» degen edi. Aıtpaqshy, qaıtyp bara jatsam, shotyma elý myń teńge tústi. Dana esimdi qyz qońyraý shalyp, keshirim surady. 50 myń teńge qalamaqym eken. Qaıta ózine salyp jiberdim. Qorlanyp ketip baram», – dedi jazýshy.

Jetisý oblysynyń jastar uıymy jazýshynyń jazbasyna qatysty resmı túsinikteme berip, jazýshymen kún tártibi kelisilmegenin atap ótti.

«2024 jylǵy 29 mamyrda Memlekettik satyp alý portaly arqyly Jetisý oblysynyń qoǵamdyq damý basqarmasy men Jastar kongresi arasynda «Qoǵamda sybaılas jemqorlyqqa qarsy mádenıet pen parasattylyqty nyǵaıtýǵa baǵyttalǵan» jobany uıymdastyrý boıynsha qyzmetterdi memlekettik satyp alý týraly shart jasaldy. Tehnıkalyq erekshelikke sáıkes, biz jyl sońyna deıin keminde 21 is-shara ótkizýdi josparlap otyrmyz. 17-qazanda tehnıkalyq erekshelikke sáıkes basqarmamen TEDx formatyndaǵy is-sharany ótkizý jáne onyń sheńberinde spıker retinde Qanat Tileýhandy shaqyrý kelisildi. Alaıda aldyn ala kelissózder barysynda biz spıkerge sharanyń kún tártibine sáıkes «Sybaılas jemqorlyqsyz bolashaq» taqyrybyna arnalǵanyn tolyq habarlamadyq jáne talqylamadyq. Sonymen qatar 2024 jylǵy 21 qazanda is-sharany ótkizý kúni qatysýshylar sany (keminde 100 adam) tolyq qamtamasyz etilmedi, nátıjesinde, kútpegen jaǵdaılar oryn alyp, spıker is-sharany ótkizý ornynan ketti. Osyǵan baılanysty, biz bul is-sharanyń shyǵyndaryn óz esebimizge alamyz. Sonymen qatar is-shara esepke engizilmeıdi jáne qaıta ótkiziledi», – delingen habarlamada.

Sondaı-aq atalǵan oqıǵaǵa qatysty Sybaılas jemqorlyqqa qarsy is-qımyl agenttiginiń baspasóz qyzmetine habarlastyq, jaýaptar qosymsha jarııalanatynyn málimdedi.