جاڭالىقتار
قوس پرەزيدەنت ءال-فارابي اتىنداعى قازۇۋ-ءدىڭ رەسەيدەگى فيليالىن رەسمي تۇردە اشتى
فوتو: اقوردا
قازاقستان مەن رەسەي پرەزيدەنتتەرى قازۇۋ-ءدىڭ ومبىداعى فيليالىن رەسمي تۇردە اشتى. بۇل تۋرالى qandastar.kz اقپارات اگەنتتىگى حابارلايدى.
قاسىم-جومارت توقاەۆ پەن ۆلاديمير پۋتين ف.م.دوستوەۆسكي اتىنداعى ومبى مەملەكەتتىك ۋنيۆەرسيتەتىنىڭ بازاسىندا ءال-فارابي اتىنداعى قازاق ۇلتتىق ۋنيۆەرسيتەتى فيليالىن رەسمي تۇردە اشۋ راسىمىنە بەينەبايلانىس ارقىلى قاتىستى.
سالتاناتتى ءىس-شاراعا قازاقستاننىڭ عىلىم جانە جوعارى ءبىلىم ءمينيسترى ساياسات نۇربەك پەن رەسەيدىڭ جوعارى ءبىلىم جانە عىلىم ءمينيسترىنىڭ ورىنباسارى كونستانتين موگيلەۆسكي قاتىسىپ, ەكى ەل اراسىنداعى عىلىم جانە جوعارى ءبىلىم سالاسىنداعى ىنتىماقتاستىق جونىندە بايانداما جاسادى.
مۇنان سوڭ مەملەكەتتەر باسشىلارى ۋنيۆەرسيتەت فيليالىن اشۋعا رۇقسات بەردى. سونداي-اق جيىنعا قازۇۋ باسقارما توراعاسى – رەكتورى جانسەيىت تۇيمەباەۆ پەن وممۋ رەكتورى سەرگەي زامياتين قاتىستى.
رەسەيدە تۇڭعىش رەت اشىلعان قازاقستاندىق جوعارى وقۋ ورنىنىڭ فيليالىنا تالاپكەرلەردى قابىلداۋ 2025 جىلدىڭ قىركۇيەك ايىنا جوسپارلانعان. قازاقستان مەن رەسەي ۇكىمەتتەرى ستۋدەنتتەردى وقىتۋ ءۇشىن ارنايى 200 گرانت ءبولدى.
قازۇۋ-ءدىڭ ومبىداعى فيليالى «حالىقارالىق قۇقىق», «قازاق فيلولوگياسى» جانە «كەدەن ءىسى» سياقتى ءبىلىم بەرۋ باعدارلامالارى بويىنشا باكالاۆرلار مەن ماگيسترلاردى دايارلايدى. بولاشاقتا قوس ديپلومدى ءبىلىم بەرۋ باعدارلاماسى جۇزەگە اسىرىلماق.
فيليالداعى وقۋ ۇدەرىسىن ۇلتتىق ۋنيۆەرسيتەتتىڭ وقىتۋشى-پروفەسسور قۇرامى قازاق, ورىس, اعىلشىن تىلدەرىندە جۇرگىزەدى.
قازىرگى ۋاقىتتا فيليالدا وقۋ-ادىستەمەلىك قىزمەتكە ارنالعان 10 كابينەت جاساقتالعان. اتاپ ايتقاندا, ستۋدەنتتەر شوقان ءۋاليحانوۆ اتىنداعى كەدەن ءىسى, اباي اتىنداعى قازاق ءتىلى جانە ءنازىر تورەقۇلوۆ اتىنداعى حالىقارالىق قۇقىق كابينەتتەرىندە ءدارىس تىڭدايدى.
