جاڭالىقتار
قوسشىدا كولىك استىندا قالعان ەكى جاسار بالانى قاعىپ كەتتى
فوتو: سكين
قوسشى قالاسىندا KIA Sportage كولىگىنىڭ جۇرگىزۋشىسى ەكى جاسار قىز بالانى قاعىپ كەتىپ, ءسابي وقيعا ورنىندا قازا تاپتى, دەپ حابارلايدى qandastar.kz
وقيعا 2025 جىلدىڭ 5 ءساۋىرى كۇنى تۇرعىن ۇيلەردىڭ ءبىرىنىڭ اۋلاسىندا بولعان. الدىن الا مالىمەت بويىنشا, كولىك تىزگىنىندەگى ايەل ادام كەرى بۇرىلۋ مانەۆرىن جاساعان ساتتە, جولدا جالعىز قالعان بالانى بايقاماي, قاعىپ كەتكەن.
وقيعانىڭ ۆيدەوسى الەۋمەتتىك جەلىلەردە تاراپ كەتتى. كادرلاردان بىرنەشە بالانىڭ اۋلادا ويناپ جۇرگەنىن كورۋگە بولادى. ءبىر ساتتە ءبارى جان-جاققا قاشادى, ال 2023 جىلى تۋعان قىز بالا جول ۇستىندە جالعىز قالادى. ءدال سول كەزدە كولىك كەلىپ, بالانى قاعىپ كەتەدى.
جەلى قولدانۋشىلارىنىڭ ايتۋىنشا, كولىك جۇرگىزۋشىسى سول اۋماقتا تۇرادى جانە شامامەن ساعات 15:30-دا كامەلەتكە تولماعان ۇلىن ىزدەپ ۇيدەن شىققان.
اتالعان فاكتى بويىنشا قىلمىستىق كودەكستىڭ ءتيىستى بابىمەن ءىس قوزعالدى. قازىرگى ۋاقىتتا تەرگەۋ امالدارى جۇرگىزىلىپ جاتىر. اقمولا وبلىسى پوليتسيا دەپارتامەنتى بۇل اقپاراتتى راستادى.
«5 ءساۋىر كۇنى قوسشى قالاسىنداعى تۇرعىن ءۇي اۋلاسىندا KIA Sportage كولىگىن باسقارعان جۇرگىزۋشى 2023 جىلى تۋعان قىز بالانى قاعىپ كەتتى. سالدارىنان بالا وقيعا ورنىندا كوز جۇمدى. اتالعان دەرەك بويىنشا قىلمىستىق ءىس قوزعالىپ, تەرگەۋ امالدارى باستالدى»,– دەلىنگەن رەسمي حابارلامادا.
