قوستاناي وبلىسىندا مەكتەپ قابىرعاسى وپىرىلدى

قوستاناي وبلىسىنداعى نوۆونەجين اۋىلىنىڭ تۇرعىندارى رەداكتسيامىزعا مەكتەپ عيماراتىنىڭ قابىرعاسى قيراعان ۆيدەونى جولدادى. جەرگىلىكتى اكىمدىك پەن مەردىگەر ۇيىم وكىلدەرى وقيعانىڭ ءمان-جايىن ايتتى, دەپ حابارلايدى KAZ.NUR.KZ ءتىلشىسى.

بۇل مەكتەپتە 300-دەن استام وقۋشى ءبىلىم الادى. ابىروي بولعاندا, مەكتەپتىڭ 3-قاباتتاعى قابىرعاسىنىڭ ءبىر بولىگى سەنبىدە قيراپ قالعان. بۇل كۇنى وقۋشىلار دەمالىستا بولدى. قوستاناي وبلىستىق اكىمدىگى قوعامدىق باسقارۋ باسقارماسىنىڭ مالىمەتىنشە, مەكتەپتە بالالار مەن مۇعالىمدەر بولعان جوق, زارداپ شەككەندەر جوق. جەرگىلىكتى جەردە كوميسسيا جۇمىس ىستەپ جاتىر, قىسقا مەرزىمدە تەحنيكالىق تەكسەرۋ جۇرگىزىلىپ, قورىتىندى شىعارىلادى. نوۆونەجين جالپى ءبىلىم بەرەتىن مەكتەبىنىڭ عيماراتىن كۇردەلى جوندەۋ 2024 جىلعى ماۋسىمنان باستاپ ءجۇرىپ جاتىر. «جوندەۋ جۇمىستارى مەرزىمدەرىنىڭ بۇزىلۋىنا جول بەرىپ وتىرعان قۇرىلىس مەردىگەرى «پكف گرەنادا» جشس. مەردىگەردىڭ اتىنا نارازىلىق نوتاسى جولداندى جانە ءونىم بەرۋشىنى مەملەكەتتىك ساتىپ الۋدىڭ جوسىقسىز قاتىسۋشىسى دەپ تانۋ ءۇشىن سوتقا ماتەريالدار دايىندالىپ جاتىر», – دەپ جازعان اكىمدىك تاراتقان اقپاراتتا.

كىنالى ادامدار جاۋاپقا تارتىلاتىنى ايتىلادى. وقۋشىلار قاشىقتان وقىتۋعا اۋىستىرىلدى. اتا-انالار بۇعان دەيىن بۇل مەكتەپتە وقۋ قاۋىپتى ەكەنىن ايتىپ, دابىل دا قاقتى. «مۇندا جوندەۋ جۇمىس ءجۇرىپ جاتقاندا ساباقتاردى وقۋ بالالار ءۇشىن تىم كوپ قاۋىپتى. بالانىڭ باسىنا نە ۇستىنە جوعارىدان ءبىر نارسە قۇلاپ كەتپەسىنە ەشكىم دە, مۇعالىم دە كەپىلدىك بەرمەيدى», – دەيدى نوۆونەجين اۋىلىنىڭ تۇرعىنى دينارا سادۋاقاسوۆا.

قۇرىلىس ءجۇرىپ جاتقان جەردە بالالاردىڭ جۇرگەنىنە مەردىگەر كومپانيا دا قارسى بولعان. الايدا, جەرگىلىكتى بيلىكتىڭ ايتقانىنان شىعا الماعان. ولار ءبىرىنشى قاباتتان بىرنەشە كابينەتتى 1-ءنشى قىركۇيەككە دەيىن جوندەپ بەرۋدى سۇراپتى. 5-9-سىنىپ وقۋشىلارى سوندا ءبىلىم الىپ جاتىر. ال, باستاۋىش سىنىپتى مەكتەپ اۋلاسىنداعى بالا-باقشاعا ورنالاستىرعان.

ء«بىز ۇنەمى سالىنىپ بىتپەگەن نىسانعا بالاباقشا, اۋرۋحانا, مەكتەپ ورنالاسقانىنا قارسىمىز. بۇل قۇرىلىس الاڭى, سوندىقتان مۇنداعى قاۋىپسىزدىككە ەشكىم كەپىلدىك بەرە المايدى. ونىڭ ۇستىنە مۇندا بالالار بولادى. ارينە, قارسى بولساق تا, سۇراعاندارىن جاساپ بەردىك. ءبىر قاناتىن ءبولىپ, ءدالىزدى جاپتىق, بولەك كىرەتىن ەسىك جاسادىق», – دەيدى مەردىگەر كومپانيانىڭ باس ديرەكتورى اناتولي گرومچەنكو.