جاڭالىقتار
قوستانايدا ورتتەن قازا تاپقان 5 بالانىڭ اناسى سوتتالدى
فوتو: اشىق دەرەككوز
جىتىقارادا ورتتەن قازا تاپقان 5 بالانىڭ اناسى سوتتالدى, دەپ جازدى qandastar.kz
قوستاناي وبلىسىنىڭ تۇرعىنى 5 جىلعا باس بوستاندىعىنان ايىرىلدى. ايەل ءورت قاۋىپسىزدىگى تالاپتارىن بۇزعانى ءۇشىن كىنالى دەپ تانىلدى.
ءىس ماتەريالىنان بەلگىلى بولعانداي, قايعىلى وقيعا كۇنى سوتتالۋشى بالالارىن قاراۋسىز قالدىرىپ كەتكەن جانە ۇلكەن ۇلىنا پەش جاعۋدى تاپسىرعان. بالاسى اعاش, كومىر جانە تۇرمىستىق قوقىستاردى جاققان, بۇدان بولەك پەشتىڭ جانىنداعى بەلگىسىز سۇيىقتىق قۇيىلعان پلاستيك بوتەلكەنى وتقا تاستاپ جىبەرگەن. سالدارىنان ءۇيدى جالىن شارپىپ, بەس بالا كوز جۇمعان.
ايەل كىناسىن تولىق مويىنداپ, ىستەگەن ىسىنە وكىنەتىنىن ايتقان جانە ونى باس بوستاندىعىنان ايىرماۋدى وتىنگەن.
كامەلەتكە تولماعان بالاسىنىڭ بولۋىنا بايلانىستى جازانى ورىنداۋ كەيىنگە قالدىرىلدى.
ۇكىم زاڭدى كۇشىنە ەنگەن جوق.
