قوسىلعان قۇن سالىعى 16%, تومەنگى شەگى – 40 ميلليون: ماجىلىستە جاڭا سالىق كودەكسى تالقىلاندى

فوتو: رixabay.com

پرەمەر-ءمينيستردىڭ ورىنباسارى, ۇلتتىق ەكونوميكا ءمينيسترى سەرىك جۇمانعارين ءماجىلىس وتىرىسىندا قوسىلعان قۇن سالىعىنا قاتىستى وزگەرىستەردى تانىستىردى. بۇل تۋرالى Stan.kz اقپارات اگەنتتىگى حابارلايدى.

جۇمانعارين كاسىپكەرلەرمەن كەڭەسە كەلە قوسىلعان قۇن سالىعى بويىنشا ەڭ تومەنگى شەكتى 40 ميلليون تەڭگە دەپ بەلگىلەۋ ۇسىنىلعانىن ايتتى.

«قوسىلعان قۇن سالىعى 16% بولادى. ەكىنشى, قوسىلعان قۇن سالىعى بويىنشا شەگى 40 ميلليون تەڭگە مولشەرىندە بەلگىلەنەدى. 40 ميلليون تەڭگە – ۇكىمەت پەن دەپۋتاتتاردىڭ كونسترۋكتيۆتى پوزيتسياسىنىڭ ارقاسىندا جەتكەن كەلىسىمنىڭ جەمىسى. بىراق ءبىز بۇدان كەيىن 160 مىڭ  جاڭا سالىق تولەۋشىلەردەن ايرىلامىز. سونىمەن قاتار قوسىلعان قۇن سالىعىنان قوسىمشا جينالاتىن 400 ميلليارد تەڭگەدەن قاعىلامىز», – دەدى ول.

وسىلايشا كاسىپكەرلەر الداعى ۋاقىتتا ۇكىمەت پەن پارلامەنت وسىنداي كەلىسىمگە كەلۋگە دايىن ەكەنىن بىلۋگە ءتيىس دەيدى.

بۇعان دەيىن ۇكىمەت قوسىلعان قۇن سالىعى بويىنشا تومەنگى شەگىن 78 ميلليون تەڭگەدەن 15 ميلليون تەڭگەگە دەيىن تومەندەتۋدى ۇسىنعان ەدى.