قوسىلعان قۇن سالىعىن كىمدەر تولەمەيدى?

فوتو: اشىق دەرەككوز

ءماجىلىس دەپۋتاتى اسحات ايماعامبەتوۆ جاڭا سالىق كودەكسىنىڭ جوباسىندا الەۋمەتتىك سالا بويىنشا قانداي تۇزەتۋلەر ەنگىزىلەتىنىن ايتتى, دەپ حابارلايدى qandastar.kz

دەپۋتاتتار سالىق كودەكسىنىڭ جوباسىن قاراۋ بارىسىندا ءبىلىم, عىلىم, مادەنيەت, سپورت جانە دەنساۋلىق ساقتاۋ سالالارىن قولداۋ جانە وسى باعىتتاردا قىمباتتاۋدى بولدىرماۋ ماقساتىندا بىرقاتار تۇزەتۋلەر ازىرلەدى.

اسحات ايماعامبەتوۆ ۇسىنىلعان نەگىزگى وزگەرىستەرگە توقتالدى.

«مادەنيەت, تاريحي-مادەني مۇرا جانە ارنايى الەۋمەتتىك قىزمەتتەر سالاسىنداعى ۇيىمداردى كتس-تەن تولىق بوساتۋ. وتاندىق كىتاپ باسىلىمدارى مەن انيماتسيا يندۋسترياسىن ققس-تان بوساتۋ, ءبىلىم, عىلىم, سپورت جانە دەنساۋلىق ساقتاۋ ۇيىمدارى ءۇشىن كورپوراتيۆتىك تابىس سالىعىن 5%-عا دەيىن تومەندەتۋ. سونىمەن قاتار قاتەرلى ىسىك, ورفاندىق, پسيحيكالىق, جۇرەك-قان تامىرلارى, بۇيرەك, اۋتويممۋندى, ديابەت جانە باسقا دا كۇردەلى اۋرۋلاردى ەمدەۋگە باعىتتالعان مەديتسينالىق قىزمەتتەردى ققس-تەن بوساتۋ; ال قالعان باعىتتار بويىنشا دا ققس-ءتى قازىرگى دەڭگەيدەگىدەي 0% كۇيىندە ساقتاۋ نەمەسە كومپروميسس رەتىندە 5%-عا دەيىن ازايتۋ. اتالعان اۋرۋلاردى ەمدەۋگە ارنالعان دارىلىك زاتتاردى ققس-تەن بوساتۋ, ال باسقا باعىتتار بويىنشا دا 0%, بولماسا كومپروميسس رەتىندە 5%-عا دەيىن ازايتۋ. ادەبي, كوركەم جانە عىلىمي شىعارمالار ءۇشىن اۆتورلىق الىمدارعا سالىق جەڭىلدىكتەرىن بەرۋ», — دەدى ول.

ونىڭ ايتۋىنشا, قارجىلىق قىزمەتتەرگە (بانكتىك اۋدارىمدار, زەينەتاقى قورلارىنىڭ قىزمەتى, تولەم كارتالارى بويىنشا وپەراتسيالار) قوسىلعان قۇن سالىعىنىڭ سالىنباۋى, ياعني بۇل سالانىڭ قىمباتتاۋىنا جول بەرمەۋ ماسەلەسى دە قامتىلعان.

 «بۋكمەكەرلىك كەڭسەلەرگە, كازينولارعا سالىقتى ايتارلىقتاي كوبەيتۋ, قۇرامىندا ترانسمايلار مەن ەنەرگەتيكالىق سۋسىندار بار ونىمدەرگە اكتسيز, كوپتەگەن مونوپوليالارعا ارنالعان سالىقتىق جەڭىلدىكتەردى جويۋ جانە ساياجايلارعا سالىناتىن سالىق مولشەرىن تومەندەتۋ دە بار», — دەدى ماجىلىسمەن.

دەپۋتات بۇل تۇزەتۋلەر ءالى جۇمىس توبىنىڭ وتىرىستارىندا تالقىلانىپ جاتقانىن, ناقتى شەشىم قابىلدانباعانىن باسا ايتتى.