كرەديتتىڭ ءبارىن تەك مال ساتىپ الۋعا عانا بەرە بەرۋگە بولمايدى – ماقسات تولىقباي

 سۋرەت: parlam.kz

ءماجىلىس دەپۋتاتى ماقسات تولىقباي پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە دەپۋتاتتىق ساۋال جولداپ, «اۋىل اماناتى» باعدارلاماسىن جۇزەگە اسىرۋداعى بىرقاتار ماسەلەنى كوتەردى, دەپ جازدى qandastar.kz

دەپۋتاتتىڭ ايتۋىنشا, 2023 جىلى باعدارلاما اياسىندا 100 ملرد تەڭگە كولەمىندە شاعىن نەسيە بەرىلىپ, 15 000 جاڭا جۇمىس ورنى اشىلعان. الايدا جوبانىڭ جۇزەگە اسىرىلۋىندا بىرقاتار قيىندىقتار بار. ونىڭ ىشىندە, نەسيە الۋشىلارعا قويىلاتىن بيۋروكراتيالىق كەدەرگىلەر مەن قارجىلاندىرۋ تەتىكتەرىنىڭ جەتكىلىكسىزدىگى باستى پروبلەمالار رەتىندە اتالدى.

نەسيە الۋ – قيىن, قارجىلاندىرۋ – جەتكىلىكسىز

ماقسات تولىقبايدىڭ مالىمەتىنشە, «اۋىل اماناتى» جوباسى 7 جىل ىشىندە 350 مىڭ جۇمىس ورنىن اشۋدى جانە جىل سايىن كەمىندە 20-25 مىڭ ازاماتقا نەسيە بەرۋدى كوزدەيدى. الايدا, وتكەن جىلى بۇل ماقساتقا تەك 20 ملرد تەڭگە بولىنگەن. سونىمەن قاتار, اۋىل كاسىپكەرلەرى قاجەتتى قۇجاتتاردى جيناۋ بارىسىندا بىرنەشە اي ۋاقىت جوعالتاتىنىن دا تىلگە تيەك ەتتى.

دەپۋتات: ء«الجۋاز الەۋمەتكە بيۋروكراتيا ءۇش-ءتورت ايلاپ قۇجات جيناتىپ, تابانىنان توزدىرادى. بۇل ءبىر. ەكىنشىدەن بۇل جوبانى قارجىلاندىرۋ تەتىگى دە قارىن اشىتادى», – دەپ اتاپ ءوتتى.

كووپەراتيۆتەردە مامان تاپشىلى

دەپۋتات اۋىل شارۋاشىلىعى كووپەراتيۆتەرىندە ۆەتەرينار, زووتەحنيك, مەحانيزاتور, اگرونوم سياقتى بىلىكتى مامانداردىڭ جەتىسپەۋشىلىگى وزەكتى ماسەلە ەكەنىن اتاپ ءوتتى. ونىڭ پىكىرىنشە, وڭىرلىك الەۋمەتتىك-كاسىپكەرلىك كورپوراتسيالار (سپك) نەسيە تاراتۋمەن عانا شەكتەلمەي, اۋىلداعى ماسەلەلەرگە كەشەندى تۇردە نازار اۋدارۋى كەرەك.

«اكىمدىكتەردى مازالايتىن ەكى-اق ماسەلە بار. نەسيە الاتىن ادامداردىڭ سانىن تولتىرۋ جانە بەرگەن اقشانى يگەرۋ. ءبىتتى», – دەدى دەپۋتات.

«اگروساۋات» وقۋ ورتالىقتارى اشىلۋعا ءتيىس

ماقسات تولىقباي پرەزيدەنتتىڭ «اگروساۋات» وقۋ ورتالىقتارىن بارلىق اۋدانداردا اشۋ تۋرالى تاپسىرماسىنىڭ ورىندالماي وتىرعانىن دا سىنعا الدى. ونىڭ پىكىرىنشە, اۋىل حالقىنىڭ تابىسىن ارتتىرۋ ءۇشىن ولارعا اۋىل شارۋاشىلىعى بويىنشا تەحنولوگيالىق كارتالارعا وقىتۋ جۇيەسىن قالىپتاستىرۋ قاجەت.

«بۇل جۇيەنى ىسكە قوسپاي, قالىپتاستىرماي اۋىل حالقىنىڭ تابىسىن كوتەرۋ مۇمكىن ەمەس. «اگروساۋات» ورتالىعى جۇيە قالىپتاستىراتىن, بىلمەگەنگە ۇيرەتەتىن, بىلگەنگە قولداۋ بولاتىن ورتالىق», – دەدى ول.

اۋىل شارۋاشىلىعىندا شەشىمىن تاپپاعان ماسەلە كوپ

دەپۋتات اۋىل شارۋاشىلىعىندا جەم-ءشوپ دايىندايتىن ورتالىقتاردىڭ جوقتىعى, ليزينگكە بەرىلەتىن تەحنيكانىڭ قوسالقى بولشەكتەرىن قامتاماسىز ەتۋ جانە قىزمەت كورسەتۋ جۇيەسىنىڭ رەتتەلمەگەنىن دە كوتەردى. بۇل ماسەلەلەردى شەشۋ ءۇشىن ناقتى شارالار قابىلداۋ قاجەتتىگىن ايتتى.

«جالپى كرەديتتىڭ ءبارىن تەك مال ساتىپ الۋعا عانا بەرە-بەرۋگە بولمايدى. مال جاتقانعا ەمەس, باققانعا بىتەدى. ال ونى باعىپ قاعۋ ءۇشىن جايىلىمداردىڭ جايىن ايتپاعاندا, ەلدە ءالى كۇنگە دەيىن كوپكە ۇلگى بولاتىن جەم-ءشوپ دايىندايتىن ورتالىقتار جۇيەسى جوق. بۇل دا وزەكتى. سونىمەن قاتار, قازىر شالعايداعى اۋىلعا ليزينگكە تراكتورلار بەرىلە باستادى. جاقسى باستاما. بىراق تەحنيكا ەرتەڭ سىنباي ما? وعان ارى قاراي قوسالقى بولشەكتەرىن قايدان الادى ەل? جاپپاي تراكتورلارعا قىزمەتتى كىم كورسەتەدى? تەحنيكانىڭ ساقتالۋىن كىم قامتاماسىز ەتەدى? قىسقاسى ايتا بەرسەڭ باسى اشىق سۇراقتار وتە كوپ. سوندىقتان سىزدەن, وسى ماسەلەلەرگە شۇعىل ارادا نازار اۋدارۋىڭىزدى سۇرايمىن», – دەدى ماقسات تولىقباي.

turkystan.kz حابارلاعانداي,  ساۋال سوڭىندا ماقسات تولىقباي ۇلتتىق ەكونوميكا مينيسترىنەن «اگروساۋات» وقۋ ورتالىقتارىن اشۋ جوسپارى مەن اۋىل شارۋاشىلىعىن قولداۋعا قاتىستى ناقتى شەشىمدەردى شۇعىل تۇردە ۇسىنۋدى سۇرادى.