Kredıttiń bárin tek mal satyp alýǵa ǵana bere berýge bolmaıdy – Maqsat Tolyqbaı

 sýret: parlam.kz

Májilis depýtaty Maqsat Tolyqbaı Premer-Mınıstrdiń orynbasary – Ulttyq ekonomıka mınıstri Serik Jumanǵarınge depýtattyq saýal joldap, «Aýyl amanaty» baǵdarlamasyn júzege asyrýdaǵy birqatar máseleni kóterdi, dep jazdy qandastar.kz

Depýtattyń aıtýynsha, 2023 jyly baǵdarlama aıasynda 100 mlrd teńge kóleminde shaǵyn nesıe berilip, 15 000 jańa jumys orny ashylǵan. Alaıda jobanyń júzege asyrylýynda birqatar qıyndyqtar bar. Onyń ishinde, nesıe alýshylarǵa qoıylatyn bıýrokratııalyq kedergiler men qarjylandyrý tetikteriniń jetkiliksizdigi basty problemalar retinde ataldy.

Nesıe alý – qıyn, qarjylandyrý – jetkiliksiz

Maqsat Tolyqbaıdyń málimetinshe, «Aýyl amanaty» jobasy 7 jyl ishinde 350 myń jumys ornyn ashýdy jáne jyl saıyn keminde 20-25 myń azamatqa nesıe berýdi kózdeıdi. Alaıda, ótken jyly bul maqsatqa tek 20 mlrd teńge bólingen. Sonymen qatar, aýyl kásipkerleri qajetti qujattardy jınaý barysynda birneshe aı ýaqyt joǵaltatynyn da tilge tıek etti.

Depýtat: «Áljýaz áleýmetke bıýrokratııa úsh-tórt aılap qujat jınatyp, tabanynan tozdyrady. Bul bir. Ekinshiden bul jobany qarjylandyrý tetigi de qaryn ashytady», – dep atap ótti.

Kooperatıvterde maman tapshyly

Depýtat aýyl sharýashylyǵy kooperatıvterinde veterınar, zootehnık, mehanızator, agronom sııaqty bilikti mamandardyń jetispeýshiligi ózekti másele ekenin atap ótti. Onyń pikirinshe, óńirlik áleýmettik-kásipkerlik korporaııalar (SPK) nesıe taratýmen ǵana shektelmeı, aýyldaǵy máselelerge keshendi túrde nazar aýdarýy kerek.

«Ákimdikterdi mazalaıtyn eki-aq másele bar. Nesıe alatyn adamdardyń sanyn toltyrý jáne bergen aqshany ıgerý. Bitti», – dedi depýtat.

«Agrosaýat» oqý ortalyqtary ashylýǵa tıis

Maqsat Tolyqbaı Prezıdenttiń «Agrosaýat» oqý ortalyqtaryn barlyq aýdandarda ashý týraly tapsyrmasynyń oryndalmaı otyrǵanyn da synǵa aldy. Onyń pikirinshe, aýyl halqynyń tabysyn arttyrý úshin olarǵa aýyl sharýashylyǵy boıynsha tehnologııalyq kartalarǵa oqytý júıesin qalyptastyrý qajet.

«Bul júıeni iske qospaı, qalyptastyrmaı aýyl halqynyń tabysyn kóterý múmkin emes. «Agrosaýat» ortalyǵy júıe qalyptastyratyn, bilmegenge úıretetin, bilgenge qoldaý bolatyn ortalyq», – dedi ol.

Aýyl sharýashylyǵynda sheshimin tappaǵan másele kóp

Depýtat aýyl sharýashylyǵynda jem-shóp daıyndaıtyn ortalyqtardyń joqtyǵy, lızıngke beriletin tehnıkanyń qosalqy bólshekterin qamtamasyz etý jáne qyzmet kórsetý júıesiniń rettelmegenin de kóterdi. Bul máselelerdi sheshý úshin naqty sharalar qabyldaý qajettigin aıtty.

«Jalpy kredıttiń bárin tek mal satyp alýǵa ǵana bere-berýge bolmaıdy. Mal jatqanǵa emes, baqqanǵa bitedi. Al ony baǵyp qaǵý úshin jaıylymdardyń jaıyn aıtpaǵanda, elde áli kúnge deıin kópke úlgi bolatyn jem-shóp daıyndaıtyn ortalyqtar júıesi joq. Bul da ózekti. Sonymen qatar, qazir shalǵaıdaǵy aýylǵa lızıngke traktorlar berile bastady. Jaqsy bastama. Biraq tehnıka erteń synbaı ma? Oǵan ary qaraı qosalqy bólshekterin qaıdan alady el? Jappaı traktorlarǵa qyzmetti kim kórsetedi? Tehnıkanyń saqtalýyn kim qamtamasyz etedi? Qysqasy aıta berseń basy ashyq suraqtar óte kóp. Sondyqtan Sizden, osy máselelerge shuǵyl arada nazar aýdarýyńyzdy suraımyn», – dedi Maqsat Tolyqbaı.

turkystan.kz habarlaǵandaı,  saýal sońynda Maqsat Tolyqbaı Ulttyq ekonomıka mınıstrinen «Agrosaýat» oqý ortalyqtaryn ashý jospary men aýyl sharýashylyǵyn qoldaýǵa qatysty naqty sheshimderdi shuǵyl túrde usynýdy surady.